Duke iu drejtua parlamentit gjerman, kancelari Olaf Scholz tha se Berlini “po vepron në koordinim të ngushtë” me aleatët e tij për dërgimin e këtyre tankeve të cilat Kievi i kërkoi vazhdimisht.
“Vendimi i fundit që ka marrë qeveria gjermane është se do t’i ofrojmë Ukrainës tanket kryesore të betejës Leopard 2. Ky është rezultat i konsultimeve intensive përsëri me aleatët tanë dhe partnerët ndërkombëtarë. Dhe këtë parim do të vazhdojmë ta ndjekim edhe në të ardhmen. Është i vetmi parim që garanton sigurinë për Evropën dhe Gjermaninë gjithashtu në një çështje kaq e rrezikshme”, ka thwnw kancelari gjerman.
E Ministri gjerman i mbrojtjes, Boris Pistorius tha se grupi i parë i tankeve pritet të mbërrijë në Ukrainë për rreth tre muaj dhe se Gjermania synon të mbështesë Ukrainën, por pa u përfshirë si “një palë” në konflikt.
“Ne do të fillojmë stërvitjen shumë shpejt tani. Do të sqarojmë shumë shpejt rrugët e furnizimit dhe mendoj se tanket e para Leopard mund të jenë në Ukrainë për rreth tre muaj. Ne kemi dy synime kryesore. Njëra është të mbështesim Ukrainën në luftën e saj për sovranitet për aq kohë sa është e nevojshme dhe e dyta është të mos bëhemi vetë palë në luftë”, tha ai.
Kancelari Olaf Scholz kishte këmbëngulur se çdo vendim për t’i dhënë Ukrainës këto tanke të fuqishme do të duhej të merrej në bashkëpunim me aleatët, kryesisht Shtetet e Bashkuara të Amerikës.
Duke e detyruar Uashingtonin të përdorë disa nga tanket e veta, Berlini shpreson të ndajë rrezikun e çdo reagimi nga Rusia.
Ndërkohë, zëdhënësi i Kremlinit Dmitry Peskov i përshkroi synimet gjermane dhe të SHBA-së me tanket si “një plan mjaft katastrofik”./Tëvë1/
