Cristiano Giuntoli arrin marrëveshjen me Napolin për ndërprerjen e parakohshme të kontratës. Drejtori Sportiv i të kaltërve dhe njëkohësisht arkitekti i skuadrës që riktheu titullin kampion në qytet pas 33 vitesh, kërkohet me ngulm nga Juventusi.
Megjithatë bardhezinjtë ia kishin bërë të qartë se nuk kanë ndërmend të paguajnë asnjë dëmshpërblim për ta marrë nga Napoli, ndaj Giuntolit iu desh të negociojë vetë me presidentin De Laurentiis.
Mediat italianë raportojnë se marrëveshja mes palëve është arritur tashmë dhe shumë shpejt Giuntoli pritet të emërohet drejtor sportiv te Juventusi, në mënyrë që të nisë punën për merkaton e bardhezinjve.
Cristiano Giuntoli është një drejtues i aftë të ‘nuhasë’ talentet dhe të ndërtojë skuadra konkurruese me pak para, ndaj edhe te Juventus e shohin si njeriun e duhur për të ndihmuar ekipin në një moment të vështirë ekonomik.
