Kryetarja e partisë “GUXO”, Donika Gërvalla, ka thënë se është koha që të ulen me partitë opozitare që të diskutojnë seriozisht koalicionet dhe sipas saj, të hiqet dorë nga mentaliteti bllokues.
Gërvalla tha se qytetari e ka thënë fjalën e vet për herë të tretë, teksa u shpreh se po do që të besojë se kjo ishte hera e fundit që vendi shkon në zgjedhje të panevojshme.
“Është koha me u ulë dhe të diskutohet seriozisht dhe të hiqet dorë nga mentaliteti bllokues. Qytetari e ka thënë fjalën e vet për herë të tretë, e ka thënë fjalën e vet qartë. Fituesi i këtyre zgjedhjeve po shihet, po presim rezultatet zyrtare, po presim certifikimin e tyre dhe po dua të besoj që ishte hera e fundit që shkojmë në zgjedhje të panevojshme dhe joracionale e jo të kuptueshme për qytetarët. Se cilët do të jenë hapat që do të ndjekim, atë do të ulemi së pari brenda koalicionit t’i diskutojmë dhe pastaj do të ulemi të diskutojmë edhe me partitë opozitare edhe do të jemi përsëri të përkushtuar dhe të angazhuar që të gjejmë mënyra për ta çarë bllokadën e krijuar”, u shpreh Gërvalla, raporton KosovaPress.
Tutje, ajo u shpreh se nuk mund ta paragjykojë rezultatin e negociatave me partitë e tjera, por sipas saj, deklarimet e partive të opozitës po duken të ngjashme me ato pas zgjedhjeve të dhjetorit të vitit të kaluar.
“Njeriu kur hyn në negociata, hyn me vullnetin për të gjetur zgjidhje të cilën unë nuk mund ta paragjykojë sot sepse në bazë të deklarimeve në media po duket sikur, të ngjashme i kemi pasur fatkeqësisht edhe pas zgjedhjeve të dhjetorit. Ne jemi të interesuar të diskutojmë me partnerët tanë potencialë, pa diskutuar paraprakisht me mediat. Rendi e kërkon që të diskutojmë me njerëzit direkt në vend që t’i dërgojmë mesazhe përmes mediave dhe këtë rend do ta respektojmë edhe me seriozitetin maksimal do të angazhohemi”, tha Gërvalla.
