Ministrja në detyrë për Punët e Jashtme dhe Diasporës, Donika Gërvalla, të hënën mori pjesë në takimin e Ministrave të Jashtëm që u zhvillua në Tiranë në kuadër të Procesit të Bashkëpunimit të Evropës Juglindore (SEECP).
Në fjalën e saj hyrëse, Gërvalla thuhet se theksoi përkushtimin e palëkundur të Kosovës për integrimin euroatlantik dhe progresin e dukshëm që vendi ka arritur në katër vitet e fundit.
Gërvalla përmendi rritjen ekonomike të qëndrueshme, dyfishimin e eksportit, rritjen e investimeve të huaja dhe rritjen e të hyrave buxhetore si tregues kryesorë të reformave të thella demokratike dhe ekonomike.
Ajo gjithashtu theksoi dorëzimin e parë të Agjendës së Reformave 2024–2027 dhe angazhimin e Kosovës për të përfituar nga Plani i Rritjes për Ballkanin Perëndimor.
“Ndër të tjera, Ministrja Gërvalla ngriti shqetësimin për veprimet destabilizuese në rajon, duke dënuar aktin e hapur të agresionit të 24 shtatorit në Banjskë, të kryer nga një grup paramilitar të organizuar, financuar dhe trajnuar nga shteti serb, si dhe sulmin e fundit kinetik mbi kanalin Ibër-Lepenc, infrastrukturë kyçe për ujë dhe energji në Kosovë. Ajo theksoi se mungesa e një reagimi të qartë dhe të unifikuar jo vetëm që krijon hapësirë për përsëritje të veprimeve të tilla, por rrezikon edhe themelet e vetë politikës së zgjerimit të BE-së”, thuhet në njoftim.
Gërvalla dënoi gjithashtu arrestimin e ish-zyrtarit të Policisë së Kosovës, Arbnor Spahiu, nga autoritetet serbe, duke konfirmuar kështu përfshirjen e shtetit serb në veprimet agresive.
Në përfundim, ministrja rikujtoi hapat konstruktivë të Kosovës për bashkëpunim rajonal, përfshirë zhbllokimin e marrëveshjeve CEFTA, ratifikimin e Procesit të Berlinit dhe heqjen e vizave për qytetarët e Bosnje e Hercegovinës.
Ajo theksoi se ndërtimi i një rajoni funksional dhe evropian kërkon përgjegjësi të barabartë, dënim të dhunës dhe respekt të ndërsjellë për fqinjësinë e mirë.
“Pa drejtësi, barazi dhe llogaridhënie të ndërsjellë, nuk mund të ketë përparim të qëndrueshëm,” përfundoi Gërvalla, duke falënderuar organizatorët për mikpritjen dhe angazhimin ndaj paqes dhe bashkëpunimit në rajon.
