Me rastin e 36-vjetorit të Deklaratës Kushtetuese të 2 Korrikut, ministrja e Drejtësisë në detyrë, Donika Gërvalla, ka kujtuar një nga aktet më të rëndësishme në historinë moderne të Kosovës, të cilin e ka cilësuar si gurin e parë themeltar të shtetësisë së saj.
Ajo ka thënë se më 2 korrik 1990, delegatët e Kuvendit të Kosovës, në kushte të jashtëzakonshme dhe nën kërcënimin e forcave speciale të policisë, u penguan të hynin në objektin e Kuvendit, por megjithatë shprehën vullnetin e popullit përmes një deklarate me të cilën Kosova u shpall njësi e barabartë në federatën/konfederatën jugosllave.
“Me 2 korrik të vitit 1990, delegatët e Kuvendit të Kosovës, në kushte të jashtëzakonshme, nën kërcënimin e armëve të njësive speciale të policisë, duke mos u lejuar të futen në objektin e Kuvendit të Kosovës, shprehën vullnetin e popullit të Kosovës përmes një deklarate me të cilën Kosova shpallet njësi e barabartë në federatën/konfederatën jugosllave. Në këtë mënyrë delegatët guximtarë të asaj kohe hodhën gurin e parë themeltar të shtetësisë sonë moderne dhe e orientuan në mënyrë të pakthyeshme Kosovën drejt Republikës”, ka deklaruar ajo.
Ajo ka shtuar se Deklarata e 2 Korrikut u bë boshti politik dhe juridik mbi të cilin u ndërtuan institucionet e Kosovës, u forcua rezistenca civile dhe u mbajt gjallë aspirata për liri, pavarësi dhe demokraci.
“Sot, Republika e Kosovës qëndron si dëshmia më e fuqishme se vizioni i 2 Korrikut ishte i drejtë, i guximshëm dhe historikisht i pandalshëm”, ka thënë Gërvalla.
Në fund, ajo ka theksuar se nderimi më i mirë për delegatët e asaj kohe është forcimi i shtetit, mbrojtja e demokracisë dhe avancimi i Republikës së Kosovës./teve1.info/
