Këto kërkime po zhvillohen për shkak se një dëshmitar, i cili ishte pjesë e Ushtrisë Çlirimtare të Kosovës, kishte rrëfyer se gjatë pranverës së vitit 1999, nga kodra matanë përmes dylbive, ka parë disa aktivitete kriminale nga forcat serbe.
Përveç dyshimit për mbetje eshtërore, dëshmitari në fjalë ka deklaruar se ushtarët serb kanë fshehur edhe një traktor nën dhe.
Sipas dëshmitarit, traktori po mbante disa gjëra që nuk ka arritur t’i identifikoj nga largësia.
Këto ishin informacione që ai i kishte dhënë policisë, por që sot ai nuk gjeti kohë të ishte me ekipet punuese në terren.
Në ditën e dytë të kërkimeve në këtë fshat, gjetjet dolën negative.
Antropologët thonë se duhen kërkime më të thella për këtë zonë, për shkak të hapësirës së madhe.
“Dëshmitari ishte larg me distancë kur ka arritur të shoh se çfarë po ndodh në këtë pjesë të fshatit. Informata tregojnë se mbetjet mortore janë në këtë zonë, por fatkeqësisht akoma nuk kemi gjetur asgjë. Do ta studiojmë vendin më shumë dhe do të vazhdojmë me kërkime”
Në Klinën e Epërme kërkimet për personat e pagjetur do të vazhdojnë edhe në ditët në vijim.
Kronika e realizuar nga Shpat Blakçori
