Kryetari aktual i Pejës, Gazmend Muhaxheri, ka konfirmuar se gara për kryetar të komunës do të shkojë në balotazh, pavarësisht se ai ka siguruar vota më shumë se çdo kandidat tjetër.
Muhaxheri falënderoi qytetarët për besimin e dhënë gjatë votimit dhe theksoi se ai dhe partia që përfaqëson janë në pozitë të favorshme.
“Jemi fitues absolut si për kryetar komune, ashtu edhe për parti. Janë duke u numëruar votat dhe shkojmë në balotazh. I presim edhe votat e diasporës,” tha Muhaxheri në një konferencë për media.
Ai shtoi se procesi nuk ka përfunduar ende, pasi po priten edhe votat e diasporës që mund të ndikojnë në rezultatin përfundimtar.
“E kemi edhe një betejë, pasi të vijnë votat e diasporës do të shohim si do të jetë rezultati përfundimtar. Aktualisht kemi më shumë vota se të tjerët,” tha ai.
Pyetjes për çfarë nënkupton fakti që gara do të vazhdojë në balotazh, Muhaxheri iu përgjigj:
“Do të thotë që duhet me punu edhe më shumë…”
Ai gjithashtu theksoi se aktualisht është 20% mbi kandidatin e dytë.
