Gazetari Armend Piro, në një lidhje direkte nga zona përballë Kryeministrisë, në emisionin “Këndi i debatit” në Tëvë1, ka raportuar për zhvillimet e fundit nga protesta në Tiranë, ku përshkallëzimi i situatës është shoqëruar me dëme në institucione dhe biznese.
Nga vendi i ngjarjes, Piro ka përcjellë pamje të dëmeve të shkaktuara, ku shihen biznese dhe banka të dëmtuara gjatë protestës.
Ai ka bërë të ditur se protesta pritet të vazhdojë deri në mesnatë, ndërsa është paralajmëruar edhe një protestë tjetër për nesër.
“Protesta pritet të vazhdojë deri në mesnatë dhe ka një thirrje tjetër për protestë edhe nesër. Tashmë, protestën nga ‘Flamingot’ e kanë marrë në dorë studentët”, ka deklaruar Piro.
Gazetari ka dhënë detaje edhe për personat e lënduar gjatë përplasjeve, duke bërë të ditur se, sipas informacioneve të raportuara në atë moment, gjashtë deri në shtatë protestues po merrnin trajtim mjekësor në spitalet e kryeqytetit.
“Momentalisht raportohet për gjashtë apo shtatë protestues që janë duke marrë shërbime mjekësore në spitalet e kryeqytetit, ndërsa punonjësit e policisë kanë pësuar lëndime më të lehta dhe janë trajtuar në spital”, ka thënë ai.
Sipas Piros, protestuesit kanë akuzuar Policinë për përdorim të tepruar të dhunës gjatë ndërhyrjes.
Situata në Tiranë mbetet e tensionuar, ndërsa zhvillimet e mëtejshme pritet të varen nga vazhdimi i protestës dhe reagimet e autoriteteve.
