Lidhja Demokratike e Kosovës ka reaguar pas koalicionit që kandidati i tyre për kryetar të Vushtrrisë, Xhafer Tahiri ka nënshkruar me Lëvizjen Vetëvendosje në këtë komunë.
Sipas LDK-së, nuk është dhënë autorizim për një koalicion të tillë dhe se veprimet e Tahirit janë individuale.
Për këtë, anëtarja e Lidhjes Demokratike të Kosovës, Besa Gaxherri ka deklaruar se kjo marrëveshje e Tahirit nuk ka qenë i koordinuar me LDK-në, duke e cilësuar si një dëm ndaj degës së LDK-së në Vushtrri.
Gaxherri ka thënë se të gjithë kryetarët e komunave duhet të konsultohen me kryetarët e kryesisë dhe gjithçka sipas saj, të vendoset politikisht nga kryesia e partive.
“Natyrisht që këto gjëra mund të ndodhin në Vushtrri është bërë një lloj marrëveshje mes Tahirit dhe VV-së, i cili nuk ka qenë i koordinuar me LDK-në dhe unë konsideroj që ka shkaktuar një dëm LDK-së në degën e Vushtrrisë. Pas zgjedhjeve ne duhet të merremi me degën, dje kur është bërë kjo marrëveshje nuk kam pasur asnjë informatë që po ndodh një gjë e tillë. Kjo marrëveshje për mua nuk do të funksionojë, nuk ka rëndësi a do të funksionojë apo jo, për mua ka një rëndësi që dega në Vushtrri tashmë ka një dridhje dhe kjo është problem për ne që duhet të kthehemi atje dhe të punojmë shumë për degën. Të gjitha komunat, të gjitha kryetarët e komunave duhet të bëjnë analizat e veta dhe që të gjithë duhet të konsultohen të komunikojnë me kryetarët dhe kryesinë dhe natyrisht pastaj të dalin qoftë me koalicione me partitë politike, por duhet të vendoset politikisht nga kryesia e LDK-së”, ka deklaruar Gaxherri në emisionin “Mesditë” në tëvë1.
Sa i përket një bashkëpunimi me LVV-në për formimin e qeverisë, kjo e fundit u shpreh se LDK-ja mund të zhvillon një takim me LVV-në, por jo një marrëveshje.
Pasi sipas saj, janë shumë arsye që LDK-ja nuk mund të bëjë marrëveshje apo koalicion me VV-në.
Derisa, ajo vitin 2025 e cilësoi si një vit të humbur për Kosovën nga partia e parë fituese e dalë në zgjedhjet 2025 – Lëvizjen Vetëvendosje.
“Ne mund të zhvillojmë një takim, por jo një marrëveshje sepse ne kemi mbi një mijë arsye se nuk mund të bëjmë marrëveshje apo koalicion me VV-në kemi dhënë propozimin tonë qysh mund të dalim nga ky vit i humbur në aspektin institucional, diplomatik, ekonomik, zhvillim gjitha për Kosovën. Viti 2025 është vit i humbur për Kosovën nga LVV, ka shtuar ajo./teve1.info/
