Sulmet ruse ia prishën gjumin Solomias.
Sërish!
Nga frika që përjetoi, dyvjeçarja ukrainase sillet nëpër bodrumin e një prej metrove të Kievit, duke refuzuar kërkesat e nënës së saj që ajo të fle.
“Shpërtheu, shpërtheu fort, shumë fort, shumë fort. Unë shkova në korridor dhe tani erdha në strehimore”, tha fëmija ukrainas Solomia Zhuravlova.
Kështu, nën sulmet e Rusisë nisi edhe një vit për ukrainasit.
Për këtë, presidenti i vendit, Volodymyr Zelenskyy, i kërkoi në janar presidentit të sapo inauguruar amerikan, Donald Trump, garanci sigurie dhe që të jetë në anën e Kievit.
Kjo në një kohë kur presidenti rus, Vladimir Putin e kishte përjashtuar mundësinë e bisedimeve të drejtpërdrejta të paqes me Zelenskyyn, duke e quajtur këtë të fundit si president jolegjitim.
Zelenskyy, me ftesë të Trump, udhëtoi për në Uashington në fund të shkurtit, me shpresën që të fitonte një mbështetje më të madhe.
Megjithatë, takimi me Trump eskaloi në grindje, ku presidenti amerikan e quajti Zelenskyyn mosmirënjohës, duke iu referuar ndihmës amerikane që mori Ukraina përgjatë viteve luftë.
Kështu, Zelenskyy, u kthye duarbosh në Kiev.
Teksa sulmet ruse vazhduan, më 30 prill Ukraina dhe SHBA- ja nënshkruan Marrëveshjen për Burimet Minerale, duke krijuar Fondin e Investimeve për Rindërtim SHBA-Ukrainë.
Në maj, Trump, kritikoi Presidentin rus Vladimir Putin për “vrasjen e panevojshme të shumë njerëzve “.
E Zelenskyy, në korrik bëri një riorganizim të Qeverisë, edhe pse riorganizimi i kabinetit nuk është parë si një ndryshim i madh, pasi udhëheqësi ukrainas vazhdon të mbështetet te zyrtarët që kanë dëshmuar efikasitetin dhe besnikërinë e tyre gjatë luftës.
Më 16 gusht, Putin u takua me Trump në Alaska , vizita e parë e udhëheqësit të Kremlinit në tokën amerikane që nga pushtimi i vitit 2022.
Takimi pasoi ultimatumin 50-ditor të Trump ndaj Putinit për të përparuar drejt një armëpushimi, më vonë i shkurtuar në 10-12 ditë, ose në të kundërtën të përballej me sanksione të ashpra.
Bisedimet nuk prodhuan as armëpushim dhe as sanksione.
Në nëntor, një skandal korrupsioni shkaktoi dorëheqjen dhe shkarkimin e dy ministrave ukrainas dhe, më vonë, të shefit të stafit të Zelensky-t, Andriy Yermak.
Ministrat e drejtësisë dhe të energjisë u shkarkuan dhe, edhe pse Zelensky nuk u përfshi, skandali u bë një nga krizat më të mëdha politike të luftës.
Në nëntor, Shtëpia e Bardhë propozoi një plan paqeje me 28 pika , duke i dhënë Zelenskyt afat deri në Ditën e Falënderimeve për të pranuar ndihmën ose rrezikon të humbasë.
Plani u vlerësua si shumë i pafavorshëm për Kievin, pasi kërkonte kufizime ushtarake, heqje dorë nga ambiciet e NATO-s dhe tërheqje territoriale.
Por, pavarësisht dyshimeve për legjitimitetin e tij, plani formoi bazën e bisedimeve të vazhdueshme, të cilat përfundimisht u reduktuan në 20 pika .
Bisedimet në mesin e dhjetorit u përqendruan në tre dokumente : një kornizë paqeje, garanci sigurie dhe një plan rindërtimi, me kontribut evropian për vendosjen e trupave .
Zyrtarët e administratës Trump thanë se garancitë ishin 90% të përfunduara , megjithëse është e paqartë nëse Kremlini do ta pranojë versionin e rishikuar të planit të paqes, pasi kjo do të binte ndesh me qëndrimin e tij maksimalist, nga i cili ishte zotuar të mos tërhiqej .
Ndryshe, që nga fillimi i pushtimit të Ukrainës nga Rusia, janë vrarë rreth 15.000 civilë ukrainas.
