E lidhur me këtë vendim, Gashi tha se komuniteti rom ka pasur një pritje të jashtëzakonshme, pasi siç tha ai, është një iniciativë që ka filluar vite më parë.
“Realisht tani janë disa procedura administrative. Së pari kryesuesja e Kuvendit duhet ta nënshkruajë këtë vendim, pastaj e njëjta shkon në Ministrinë e Pushtetit Lokal për interpretim ligjor dhe pastaj mund të hyjë në fuqi. Prandaj, më vonë gjatë ditëve në vazhdim, mund të kemi mundësinë që ndonjë dokument eventual ta lëshojmë në gjuhën rome. Kjo iniciativë e ndërmarrë vite më parë, është konkretizuar me një vendim të Kuvendit Komunal, po ashtu ka pasur një pritje të jashtëzakonshme të komunitetit rom për këtë vendim”, tha Gashi në emisionin “Ditari” në Tëvë1.
Më tej, Gashi tregoi arsyet kryesore pse Komuna e Prizrenit ka vendosur ta marrë këtë vendim.
“Duke pasur parasysh që gjuha rome është gjuhë tradicionale që është përdorur në Prizren dhe duke pasur parasysh që ky komunitet numrin më të madh të qytetarëve e ka në këtë komunë, pra duke u bazuar në të gjitha këto elemente, kemi vendosur që këtë gjuhë ta njohim si gjuhë në përdorim zyrtar”, deklaroi tutje ai.
Ndërsa lidhur me këtë çështje, kryetari i Komunës, Shaqir Totaj, ka thënë se ky komunitet ka trashëgimi unike dhe ndër prioritetet e Komunës është mbrojtja e të drejtave të komuniteteve si dhe e të gjithë qytetarëve të Komunës së Prizrenit, pa dallim./Tëvë1.info/.
