Anëtari i Komisionit Qendror të Zgjedhjeve (KQZ), Ilir Gashi, ka shprehur shqetësim për parregullsitë e evidentuara në vendvotimin 2207/01 në fshatin Belinc të Komunës së Shtimes.
Përmes një postimi në Facebook, Gashi ka bërë të ditur se ekzistojnë indikacione të qarta për shkelje të rëndë të procesit zgjedhor, duke përfshirë dyshime për përdorimin e metodës së njohur si “Treni Bullgar”, gjetjen e një fletëvotimi fals dhe mungesën e fletëvotimit origjinal.
“Bazuar në të dhënat e paraqitura, ekzistojnë indikacione të qarta për shkelje të rëndë të procesit zgjedhor, përfshirë dyshimet për përdorimin e metodës së njohur si ‘Treni Bullgar’, gjetjen e një fletëvotimi fals dhe mungesën e fletëvotimit origjinal. Këto elemente përbëjnë dyshime serioze për kryerjen e veprave penale që cenojnë integritetin e zgjedhjeve,” shkroi ai.
Gashi ka bërë thirrje për një hetim të menjëhershëm dhe të paanshëm nga organet kompetente, duke theksuar se:
“Nëse këto dyshime vërtetohen, ky rast nuk guxon të mbetet në heshtje dhe pa pasoja ligjore, sepse çdo veprim që cenon vullnetin e qytetarëve përbën rrezik serioz për procesin demokratik në vend.”
Lidhur me këtë rast, kryeprokurori i Ferizajt, Burim Çerkini, ka autorizuar policinë për të mbledhur informacione. Këtë e ka konfirmuar për Televizionin Tëvë1 Vjosa Baftiu, zëdhënëse e Prokurorisë Themelore në Ferizaj.
“Kryeprokurori i ka autorizuar policinë për të grumbulluar informacione rreth këtij rasti. Pastaj mbetet të shihet se çka do të del nga këto informacione dhe se si do të procedohet tutje me rastin,” tha ajo.
Ndërkaq, Ekipi i kandidatit Muhamet Ademaj ka reaguar me një deklaratë për opinionin publik, ku distancohet nga fleta e votimit të falsifikuar që është gjetur në kutinë e votimit për kryetar në atë vendvotim.
“Është gjetur një fletë votimi e falsifikuar për kandidatin Muhamet Ademaj në kutinë e votimit për kryetar. Ne sqarojmë se ekipi ynë nuk ka asnjë lidhje me këtë veprim dhe nuk e ka vendosur fletën e përmendur. Ky është një rast i dyshuar i manipulimit të procesit zgjedhor, i njohur ndryshe si praktika e paligjshme ‘treni bullgar’,” thuhet në deklaratë.
Në të njëjtën kohë, ata kërkojnë hetim të plotë dhe të pavarur nga organet kompetente, si dhe verifikimin e numrit të nënshkrimeve të votuesve për të siguruar që çdo votë e vlefshme i përket një qytetari real dhe të regjistruar.
“Ne do të vazhdojmë të mbrojmë integritetin e procesit zgjedhor dhe të respektojmë ligjin në çdo hap,” përfundon deklarata e ekipit të kandidatit Muhamet Ademaj.
