Këtë javë luhet xhiro e 35-të në Superligën e Kosovës, pjesë e së cilës janë disa ndeshje interesante.
Gara për titullin e kampionit në elitën e futbollit kosovar vazhdon ende, me Ballkanin e Dritën që po luftojnë për vendin e parë.
“Portokallezinjtë” kërkojnë fitore që të jenë sa më afër titullit të dytë radhazi në Superligë, gjersa skuadra ferizajase synim kryesor ka mbetjen në ligë pa barazh.
Klubi bardhekaltër në dy ndeshjet e fundit ka lëshuar pikë të rëndësishme, teksa me fitore në këtë ndeshje dëshiron të vazhdojë ëndrrën për titullin e katërt në histori të këtij klubi.
Malisheva, e drejtuar nga Bylbyl Sokoli me fitore pothuajse do të siguronte mbijetesën në Superligë.
Gjilanin kjo xhiro e gjen si mysafir i Llapit në Podujevë, me “Skifterat” që po mundohen të sigurojnë vendin e tretë në tabelë me një fitore në “Zahir Pajaziti”.
Llapi, i cili tashmë ka mbetur pa objektiva, po kërkon fitoren pas gjashtë ndeshjeve në ligë pa fituar.
Ekipi kryeqytetas, Prishtina do të jetë nikoqire e Drenicës, e cila tashmë ka rënë në Ligën e Parë.
Ndeshja që luhet në “Fadil Vokrri”, ka rëndësi të madhe për Prishtinën, pasi me fitore shpreson që të përfundojë në vendin e katërt.
Dukagjini – Trepça ’89, dy klubet hyjnë në këtë takim me objektiva të ndryshme.
Dukagjini i Armend Dallkut po lufton për ta mbajtur pozitën e katërt, me shpresën që do të kualifikohet në Evropë, gjersa ’89-shi ka synim që të zë barazhin.
Të gjitha këto ndeshje do të luhen ditën e shtunë me fillim nga ora 15:00.
Tabelës së klasifikimit në elitën e futbollit kosovar i prin Ballkani me 69 pikë, ndërsa në vendin e dytë është Drita me 67 pikë. Vendin e tretë që të dërgon në Evropë e zë Gjilani me 52 pikë.
Në pozitën e barazhit është Ferizaj me 38 pikë, teksa vendin e e 9-të dhe të 10-të i zënë ’89-shi dhe Drenica.
