Trepça ’89, do të drejtohet nga Gani Sejdiu në sezonin 2025/26 në Ligën e Parë të Kosovës, me synimin për t’u rikthyer në Superligë.
Klubi nga Mitrovica, të enjten ka bërë të ditur se Sejdiu është emëruar trajner dhe do të udhëheq një projekt të ri dha ambicioz të 89-shit.
Në fakt, Sejdiu rikthehet në krye të Trepçës ’89 pasi më herët ka punuar në këtë skuadër, ndërsa gjatë karrierës ka udhëhequr shumë ekipe të Kosovës.
“Me një përvojë të pasur në futbollin kosovar dhe një vizion të qartë për zhvillimin dhe suksesin e skuadrës, Gani Sejdiu rikthehet në pankinën tonë për të udhëhequr një projekt të ri dhe ambicioz. Besimi ynë në profesionalizmin, përkushtimin dhe aftësitë e tij është i plotë — dhe jemi të bindur se me të në krye, Trepça’89 do të ecë drejt objektivave madhore”, thuhet në njoftimin e Trepçës ’89.
Me Sejdiun në krye të ekipit, Trepça ’89 do të jetë kandidate serioze për titullin e kampionit në Ligën e Parë, sukses që automatikisht i ngrit në Superligë.
