Ka marrë pjesë në dy Kupa Bote, ka luajtur në total 54 ndeshje me Kolumbinë dhe ka shënuar 13 gola. Referenca është Antony De Avila Charris, 58 vjeç, një ish-futbollist kolumbian, që gjendet pas hekurave si narkotrafikant “kalibri”. Bashëshortja e tij, Lyda Valenzuela, pretendon se është i pafajshëm dhe se i kanë mbaruar paratë për të paguar avokatët.
“Duhej të shisnim prona, na duhen burime të tjera por nuk kemi më”.
Ish-futbollisti është në burg në Napoli, pasi u arrestua nga agjentët e Komisariatit Vicaria Mercato, në Piazza De Nicola, në Porta Capuana, më 21 shtator 2021.
“U lodha duke trokitur dyer më dyer, – thotë gruaja e De Avila – për të kërkuar ndihmë nga shumë njerëz, ish-lojtarë që kanë luajtur me Anthony-n, drejtues, trajnerë, tifozë, politikanë. Ata thanë se do të na ndihmonin, por u zhdukën, nuk hapin as telefonin. Ndihem e vetmuar. Atë dashuri që ia shprehën Anthony-t kur ishte lojtar nuk e shoh më tani”.
De Avila, i mbrojtur nga avokati Fabrizio De Mario, vuan vendimin e formës së prerë të vendosur pikërisht për krime që lidhen me trafikimin e sasive të mëdha të drogës. Sipas hetuesve, ish-futbollisti ishte i lidhur me kartelin “Cali”, ku mbante një rol shumë të rëndësishëm drejtues, atë të garantuesit: ishte ai që vendoste nëse kokaina duhej të mbërrinte apo jo në Itali. De Avila u arrestua në vitin 2001 dhe qëndroi në qeli për disa ditë përpara se të lirohej nga burgu. Prej atij momenti i kishte humbur gjurmët, deri më 21 shtator të vitit të kaluar, kur Policia e Shtetit e identifikoi dhe e arrestoi në bazë të një urdhër-arresti të Prokurorisë së Përgjithshme pikërisht për trafik ndërkombëtar droge.
