Hulumtuesi i lartë në Institutin për Studime të Luftës Hibride “Octopus”, Gurakuç Kuçi ka reaguar ndaj retorikës së përdorur gjatë fushatës zgjedhore në Serbi, duke thënë se Kosova është shndërruar në kryefjalë të partive që, sipas tij, janë pasardhëse të regjimit të Sllobodan Millosheviqit.
Kuçi ka vlerësuar se deklaratat dhe veprimet e fundit në fushatën elektorale në Serbi po shpërfaqin planet politike kundër Kosovës, të lidhura me idenë e “Serbisë së Madhe”, tash të artikuluara nën konceptin e “Botës Serbe”.
Sipas tij, paraqitjet e politikanëve serbë dhe prania e Milan Radoiçiqit në aktivitetet politike tregojnë përpjekje për të krijuar klimë nacionaliste dhe armiqësore ndaj Kosovës.
“Daçiq, në fushatën e tij, shpërfaq planin se si synojnë që një ditë ta ripushtojnë Kosovën, duke valëvitur përsëri flamurin në Prizren. Në anën tjetër, kryeterroristi Milan Radoiçiq shfaqet lirshëm në fushatën politike për të krijuar terrenin që të fitojë përsëri regjimi i Vuçiqit”, ka shkruar Kuçi.
Lexo po ashtuRexhaj: Opozita po e çon vend drejt zgjedhjeve, ne nuk i duam atoAi ka kritikuar edhe qasjen e disa vendeve perëndimore ndaj Serbisë, duke thënë se përpjekjet për ta larguar Beogradin nga ndikimi rus nuk duhet të shoqërohen me tolerim të veprimeve destabilizuese ndaj fqinjëve.
“Një qasje e tillë bie ndesh me parimet dhe standardet që vetë Perëndimi promovon. Kjo mendësi realisht nxit kulturën e pandëshkueshmërisë, e cila ushqen ekstremizmin, ndërsa ekstremizmi prodhon destabilizim”, ka theksuar ai.
Kuçi ka shtuar se Bashkimi Evropian do të reagonte menjëherë nëse deklarata të ngjashme do të vinin nga politikanë në Kosovë.
Sipas tij, nuk duhet lejuar normalizimi i gjuhës së mobilizimit nacionalist, pasi kjo mund të krijojë rrethana të rrezikshme dhe të pakontrollueshme në të ardhmen.
