Ushtruesi i detyrës së kryetarit të Gjykatës Administrative, Rexhep Gashi, u shpreh se funksionalizimi i kësaj gjykate javën e fundit përfaqëson hap të madh drejt sundimit të ligjit, rritjes së sigurisë juridike dhe avancimit të mbrojtjes gjyqësore të qytetarëve dhe bizneseve në raport me administratën publike.
Këto komente, Gashi i bëri në diskutimin e organizuar nga Oda Ekonomike Amerikane me rastin e funksionalizimit të Gjykatës Administrative.
“Konsideroj që funksionalizimi i kësaj gjykate, përfaqëson një hap të madh drejt sundimit të ligjit, rritjes së sigurisë juridike dhe avancimit të mbrojtjes gjyqësore të qytetarëve dhe bizneseve në raport me administratën publike. Roli primar i vetë Gjykatës Administrative është kontrolli i veprimtarisë së administratës publike dhe ky kontroll do të realizohet përmes mbrojtjes gjyqësore që gjykata do t’ia ofrojë të gjitha palëve që i drejtohen gjykatës”, tha Gashi, raporton KosovaPress.
Ndërsa, kryetari i Odës Ekonomike Amerikane në Kosovë, Arian Zeka, tha se themelimi i Gjykatës Administrative gjatë javës së kaluar është një prej zhvillimeve më të mëdha gjatë këtij viti për sa i përket arkitekturës gjyqësore në vend.
“Themelimi dhe funksionalizimi i Gjykatës Administrative gjatë javës së kaluar është një prej zhvillimeve më të mëdha gjatë këtij viti për sa i përket ndryshimit të arkitekturës gjyqësore në Kosovë. Çështjet juridike dhe siguria juridike për investitorët nuk është një koncept abstrakt, por është një çështje që ata e përjetojnë në baza të rregullta dhe rrjedhimisht rritja e efikasitetit, ashtu siç është synuar edhe me themelimin e gjykatës së re, bie si një prej përgjegjësive më të rënda edhe mbi Gjykatën Administrative si trupë, por edhe mbi drejtuesit e saj”, tha ai.
E, avokatja me përvojë të gjatë, Vjosa Shkodra, u shpreh se bizneset i kanë sytë kah Gjykata Administrative për shkak të kërkesave të tyre që nuk duan të ketë burokraci, por duan parashikueshmëri dhe një adresë se ku mund të trajtohet një kontest i tillë.
Shkodra tha se frikësohet se edhe Gjykatën Administrative do ta përcjell vjetërsia e lëndëve, por shtoi se lajm i mirë është se do të bëhet transferimi i gjyqtarëve me përvojë.
“Pritshmëritë janë që zbatimi të jetë shumë efektiv, pasi bizneset dekurajohen kur e kanë këtë pasigurinë juridike. Fakti tjetër është që kanë shumë frikë që na përcjell vjetërsia e lëndëve. Rrjedhimisht, i njëjti fat, shpresoj të mos jetë ashtu, do ta përcjell edhe Gjykatën Administrative. Kështu që zbatimi është tejet me rëndësi për Gjykatën Administrative. Është lajm i mirë që do të bëhet transferimi i gjyqtarëve që veçse kanë përvojë. Kjo i bie që nuk fillon gjykata prej zeros”, tha ajo.
Teksa Agon Drini nga “Kerveshi & Partners”, tha se themelimi i Gjykatës Administrative paraqet gurëthemelin kryesor të reformës së drejtësisë së këtij viti bashkë me Gjykatën Komerciale në drejtim të etablimit të një drejtësie më të konsoliduar komerciale dhe administrative.
“Nëse shikohet nevojshmëria e themelimit të Gjykatës Administrative në spektrin rajonal dhe ndërkombëtar, me plot të drejtë duhet të them se themelimi i saj ka qenë i domosdoshëm sepse të gjitha shtetet rajonale në Ballkanin Perëndimor kanë gjykatë të specializuar administrative, madje shumica prej tyre kanë edhe shkallën e dytë, përveç Bosnjës”, tha ai.
Deri në themelimin e Gjykatës Administrative, konfliktet administrative janë trajtuar nëpër gjykata të tjera, ku deri në vitin 2013, ato janë trajtuar nga Gjykata Supreme, ndërsa pas reformave në vitin 2013, një pjesë e konflikteve administrative kanë kaluar në Gjykatën Themelore në Prishtinë, Departamenti për Çështje Administrative.
