Fundori Dominic Artis është i ftuari i ri në Përfaqësuesen e Kosovës në basketboll. Ai është përfshirë në listën e zgjeruar të selektorit Rami Hadar për ndeshjet parakualifikuese të “Eurobasket 2025”.
Artis është natyralizuar me kërkesën e trajnerit Hadar dhe do të jetë pjesë e Kosovës për ndeshjet e muajit korrik dhe gusht.
Artis 29-vjeçar prej vitit 2017 luan në Evropë, ndërsa karrierë ka bërë te skuadrat si Czarni Slups e Dabrowa Gornicza (Poloni), Igokea (Bosnjë e Hercegovinë), Pesaro (Itali), Cedevita Olimpija (Slloveni) e Kolossos Rodou (Greqi). Së fundmi, ai ka luajtur në Francë te Cholet Basket dhe ka pasur një mesatare prej 16 pikëve për ndeshje. Artis është vetëm i natyralizuari i radhës te Kosova, pasi më herët me pasaportë kosovare janë pajisur edhe Justin Doellman, Scott Bamforth, Shawn Jones, Divine Myles e Malcolm Armstead.