Forca e Sigurisë së Kosovës, këtë vit ka shënuar 12-vjetorin e partneritetit me Gardën Kombëtare të shtetit të Iowa-s.
Tash kur janë bërë më shumë se një dekadë bashkëpunimi, kjo Gardë vlerësoi lart punën e ushtrisë kosovare.
“Është impresionuese ngazëllimi i pjesëtarëve të FSK-së për të mësuar. Ata e duan Iowa-n, e duan Amerikën”, tha Marty Hogan – Garda Kombëtare e Iowa-s.
Përmes një statusi në rrjetin social “Facebook”, edhe ministri i Mbrojtjes, Armend Mehaj u shpreh se ky bashkëpunim ndërmjet Kosovës dhe SHBA-së, është i përjetshëm.
“Partneritet ky që çdo vit e më shumë është thelluar, duke u lidhur fuqishëm mbi parimin e ruajtjes së vlerave demokratike dhe stabilitetit të vendeve përmes shkëmbimit të përvojave në fushën ushtarake, trajnimit të përbashkët e edukimit të kuadrove të reja”, deklaroi Mehaj.
Bashkëpunimin ushtarak me Shtetet e Bashkuara, e komentuar edhe ish-komandanti i FSK-së, Kadri Kastrati.
Ai thotë se ndihma amerikane drejtuar ushtrisë së vendit është në forma të ndryshme.
Teksa, Kastrati ka një rekomandim për Qeverinë e Kosovës.
Forca e Sigurisë së Kosovës, nga një forcë për emergjenca civile, në vitin 2018 me mbështetjen amerikane mori kompetenca ushtarake.
Plani i tranzicionit të saj parashihet të zhvillohet për 10 vjet.
