Forca e Sigurisë së Kosovës ka realizuar “Forumin e Nënoficerëve të FSK-së”, me qëllim fuqizimin e bashkëpunimit profesional dhe shkëmbimin e përvojave ndërmjet nënoficerëve dhe oficerëve të rinj.
Sipas FSK-së, hapjen zyrtare të forumit e bëri Komandanti i Komandës së Doktrinës dhe Stërvitjes (KDS), Gjeneral Brigade Jeton Dreshaj, i cili theksoi rëndësinë e rolit të nënoficerëve në ndërtimin e një force profesionale, duke i cilësuar ata si shtyllë kryesore për realizimin e detyrave dhe misionit të FSK-së.
Forumi u udhëhoq nga Rreshter Majori i FSK-së, Bedri Zuka, i cili ritheksoi përkushtimin e nënoficerëve në ngritjen e kapaciteteve të FSK-së në të gjitha nivelet.
Gjatë forumit u theksua gjithashtu rëndësia e bashkëpunimit me Gardën e IOWA-s, si faktor kyç në zhvillimin dhe edukimin profesional të nënoficerëve të FSK-së.
Në këtë forum morën pjesë nënoficerë të FSK-së nga të gjitha nivelet, të cilët diskutuan tema të ndryshme që lidhen me zhvillimin e korit të nënoficerëve, ndërtimin e besimit dhe fleksibilitetit në udhëheqje, si dhe marrëdhëniet ndërmjet nënoficerëve dhe oficerëve.
Pjesë e forumit ishin edhe përfaqësues nga Ambasada e Shteteve të Bashkuara të Amerikës, Forcat e Armatosura të Shqipërisë, Garda Kombëtare e Ajovës, NALT, ASG Ballkan dhe institucione të tjera partnere.
“FSK është e përkushtuar në ngritjen dhe zhvillimin e mëtejmë të korit të nënoficerëve si shtylla kryesore e forcës për kryerjen me sukses misionit kushtetues dhe ligjor”, theksohet në njoftim./teve1.info/
