Pjesëtarët e Forcës së Sigurisë së Kosovës (FSK) janë vlerësuar me çmime dhe mirënjohje në ceremoninë përmbyllëse të Operacionit “Interflex” në Mbretërinë e Bashkuar, në shenjë vlerësimi për punën, përkushtimin dhe kontributin e tyre gjatë realizimit të misionit shumëkombësh për trajnimin e forcave ukrainase.
Kosova është pjesë e Operacionit “Interflex” që nga fillimi i vitit 2024, duke kontribuar me instruktorë dhe personel të specializuar në programet e trajnimit për ushtarakët ukrainas.
Gjatë kësaj periudhe, FSK ka marrë pjesë me pesë kontingjente të njëpasnjëshme, duke dëshmuar profesionalizëm dhe aftësi të larta ushtarake në mjedise shumëkombëshe.
Sipas vlerësimeve të partnerëve ndërkombëtarë, pjesëtarët e FSK-së kanë treguar nivel të lartë përkushtimi dhe ndërveprueshmëri me forcat aleate, duke forcuar reputacionin e Kosovës si një kontribuuese e besueshme në operacionet ndërkombëtare të sigurisë.
“Operacioni “Interflex” është një iniciativë shumëkombëshe e udhëhequr nga Mbretëria e Bashkuar, e cila synon përgatitjen dhe trajnimin e forcave ushtarake ukrainase për të rritur kapacitetet e tyre operacionale dhe gatishmërinë për mbrojtjen e vendit”, thuhet në njoftimin e FSK-së.
Përveç pjesëmarrjes në këtë mision, Kosova ka mbështetur vazhdimisht Ukrainën edhe përmes angazhimit në konferenca dhe forume ndërkombëtare të koordinimit të ndihmës, si dhe përmes ofrimit të pajisjeve dhe donacioneve për Forcat e Armatosura të Ukrainës.
Në njoftim thuhet se këto angazhime pasqyrojnë përkushtimin e Kosovës ndaj vlerave demokratike, respektimit të së drejtës ndërkombëtare dhe solidaritetit me popullin ukrainas, duke e pozicionuar vendin si një partnere aktive dhe të përgjegjshme në përpjekjet për paqe, siguri dhe stabilitet në Evropë.
Vlerësimet e ndara në ceremoninë përmbyllëse janë konsideruar dëshmi e profesionalizmit dhe standardeve të larta të pjesëtarëve të FSK-së, si dhe e kontributit të tyre në forcimin e partneritetit me vendet aleate dhe sigurisë ndërkombëtare./teve1.info/
