Me buqetë lulesh në duar prisnin të nis ceremonia.
Kjo pasi që 18 kadetë të FSK-së të premten përfunduan diplomimin e tyre pas katër vitesh studime.
Gjithçka nisi me intonimin e himnit të flamurit.
Në rend të parë zunë vendet, oficerë të gjeneratës së 2025-të.
Për të parë nga afër këtë ceremoni, të pranishëm qenë edhe krerët shtetërorë.
Komandantja supreme e FSK-së, Vjosa Osmani-Sadriu tha se kjo gjeneratë do ta afrojë vendin drejt anëtarësimit në NATO.
“Ju jeni besimi ynë se Republika e Kosovës do të jetë gjithmonë në duart e sigurta, të ndershme dhe të vendosura. Gjenerata 2025, ju jeni pasqyra e një force që ecën me hap të sigurt drejt NATO-së, drejt standardeve më të larta të mbrojtjes, dhe drejt rolit të saj të denjë në mbrojtjen e paqes brenda dhe jashtë kufijve tanë. Të dashura kadetë dhe kadetë, në rolin tim si komandante supreme e FSK-së, jam e vetëdijshme e kuptimit të hapit tuaj të para katër viteve, kur prekët ëndrrën tuaj për tu bërë kadetë të Akademisë së Mbrojtjes dhe rëndësinë dhe rrugëtimit tuaj plot sfida për të arritur në ditën e sotme”, deklaroi Osmani.
E kryeministri në detyrë, Albin Kurti u shpreh krenar me këtë arritjes të 18 oficerëve të rinj.
“Ushtarët tanë janë të gatshëm kurdo dhe kudo të garantojnë sigurinë e qytetarëve dhe të mbrojnë Republikën e Kosovës. Teksa qëndroj këtu para jush, dua të shpreh krenarinë që ndjejë për Forcën e Sigurisë së Kosovës. Për secilën dhe secilin prej juve këtu. Padyshim suksesi juaj sot është rezultat i një pune të madhe ekipore investimi ministror në trajnimin e shkollimin e ushtarakëve dhe furnizimin me armatime. Edhe më shumë se kaq është investim i juaji shpirtërorë e intelektual dhe mbështetje parezervë nga familjet tuaja”, tha Kurti.
Më pas, aty u bë edhe drill ceremonial nga kadetët e FSK-së.
Pas kësaj, u bë edhe ndarja e diplomave.
Ndërkaq, kadetja më e dalluar e klasës 2025, u zgjodh Zana Hashani.
Ajo tha se rrugëtimi ka qenë i vështirë, por ka arritur qëllimin e saj.
“Shpesh më është bërë pyetja pse vendose të bëhesh pjesë e FSK-së, duke kujtuar historinë e lavdishme të Kosovës, sakrificat e brezave paraprak krimet barbare që familjet tona përjetuan gjatë luftës, mendoj se pyetja duhet të jetë, pse të mos jesh pjesë e FSK-së. Liria e Kosovës është fituar me gjak nda djemtë dhe vajzat e Ushtrisë Çlirimtare të Kosovës, që në vitet më të errëta të popullit tonë, dhanë çmos për atdheun”, tha kadetja, Zana Hashani.
Në fund, krerët e shtetit bënë fotografi të përbashkët me oficerët e rinj të FSK-së.
