Rruga kryesore, e cila i lidhë katër fshatra të Komunës së Preshevës është e paasfaltuar.
Banori i fshatit Ilincë, Adem Ademi, thotë se tri rrugë të këtij fshati janë vështirë të kalueshme.
“Kjo rrugë i lidhë katër fshatra të Komunës së Preshevës, si Ilincë, Ranatoc, Buhiq dhe Maxhere, njëri nga këta fshatra e ka rrugën e asfaltuar e tre të tjerë jo”, thotë ai.
Nga gjashtë kilometra rrugë, vetëm dy prej tyre janë të asfaltuar.
Sipas Ademit, ky problem i rrugës është edhe kur bie shi edhe kur ka pluhur.
Ai thotë se nuk janë të informuar se sa kjo gjendje do të vazhdojë.
Nga Komuna e Preshevës tregojnë se për këtë rast janë në proces gjyqësor. Nënkryetari, Almin Shaqiri, thotë se malësinë e Preshevës e kanë prioritet, mirëpo kanë probleme me kompaninë që e kanë kontaktuar.
Mirëpo, një version ndryshe e kanë nga kompania “SABA BELLÇA”.
Drejtuesit e saj përmes telefonit tregojnë se punimet janë ndërprerë për shkak që siç thonë ata, Komuna e Preshevës nga viti 2018-të nuk ka parapa buxhet për këtë rrugë.
Sipas tyre, në momentin që planifikohet buxheti, punimet do të vazhdojnë.
Në këto fshatra ka njëzet shtëpi banimi. Dhjetë prej tyre janë në fshatin Ilincë, tetë në fshatin Maxhere dhe dy të tjera në fshatin Ranatoc.
