Franca dhe Anglia do të përballen sonte në ndeshjen për vendin e tretë të Kupës së Botës 2026, në një duel që i shton një tjetër kapitull një rivaliteti që daton që nga vitet 1920.
Takimi në stadiumin “Hard Rock” zhvillohet pasi të dyja kombëtaret u eliminuan në gjysmëfinale. Franca u mposht nga Spanja, ndërsa Anglia u ndal nga kampionia në fuqi, Argjentina, duke humbur mundësinë për të luftuar për trofeun.
Edhe pse ndeshja për vendin e tretë konsiderohet shpesh si një sfidë pa peshën emocionale të finales, përballja mes dy prej kombëtareve më të mëdha të futbollit evropian pritet të ofrojë spektakël, falë cilësisë së lartë të lojtarëve në të dyja skuadrat.
Franca dhe Anglia janë përballur 32 herë më parë, ndërsa ndeshja e sontme do të jetë takimi i tyre i 33-të.
Përballja e fundit mes dy kombëtareve në Kupën e Botës u zhvillua në çerekfinalen e Botërorit “Katar 2022”, ku Franca fitoi 2-1 dhe siguroi kualifikimin në gjysmëfinale.
Në atë ndeshje, Aurelien Tchouameni kaloi francezët në epërsi me një gol nga distanca në minutën e 17-të. Harry Kane barazoi rezultatin nga penalltia në fillim të pjesës së dytë, ndërsa Olivier Giroud riktheu avantazhin për Francën me një gol me kokë.
Anglia pati mundësinë ta dërgonte ndeshjen në vazhdime, pasi fitoi një tjetër penallti në minutat e fundit, por Kane dështoi nga pika e bardhë, duke e dërguar topin mbi traversë dhe duke i dhënë fund ëndrrës së “Tre Luanëve” për titullin botëror.
Në sfidën e sontme, që zhvillohet ng aora 23:00, të dyja ekipet do të synojnë ta mbyllin turneun me fitore dhe medaljen e bronztë.
Formacionet e mundshme:
Franca: (4-2-3-1): Brice Samba; Malo Gusto, Ibrahima Konate, Maxence Lacroix, Theo Hernendez; N’Golo Kante, Warren Zaire-Emery; Desire Doue, Rayan Cherki, Ousmane Dembele; Kylian Mbappe
Anglia: (4-2-3-1): Jordan Pickford, Djed Spence, John Stones, Marc Guehi, Nico O’Reilly, Elliot Anderson, Declan Rice, Morgan Rogers, Jude Bellingham, Anthony Gordon, Harry Kane.
