Nga 26 tetori, sytë i kanë të gjithë nga presidentja e Kosovës.
Shefja e shtetit, Vjosa Osmani nga e diela ka kohë 10 ditë për t’i ftuar partitë politike në takim për të diskutuar rreth hapave drejt formimit të Qeverisë, pas dështimit të mandatarit të parë, Albin Kurti për ta bërë ekzekutivin.
Sipas zyrës së presidentes, Osmani do të bëjë thirrje për një kompromis politik, nëpërmjet të cilit do të garantohet interesi i Kosovës dhe i qytetarëve të saj, si dhe të sigurohet rruga përpara për avancimin e vendit.
Po ashtu, theksohet si pikë diskutimi rëndësia e miratimit të buxhetit për vitin 2026.
“Presidentja Osmani, në konsultat që do t’i zhvillojë me partitë politike, do ta potencoj rëndësinë e miratimit të Buxhetit për vitin 2026 si dhe miratimin e Planit të Rritjes, si akte të domosdoshme për stabilitetin institucional dhe funksionimin normal të shtetit si dhe për zhvillimin ekonomik të vendit tonë. Në këtë kuadër, Presidentja do t’i inkurajojë partitë politike të bashkëpunojnë për ta shmangur çdo bllokadë që mund të ndikojë negativisht në mirëqenien e qytetarëve dhe në funksionimin e institucioneve të Republikës së Kosovës”, ka thënë Bekim Kupina, këshilltar i presidentes.
Nga Instituti Demokratik i Kosovës, hulumtuesi Vullnet Bugaqku sqaron se si veprohet kur dështon herën e parë formimi i Qeverisë.
“Pra, presidentja duhet me kujdes që në rast se dështohet herën e parë të i thërras përsëri partitë politike parlamentare dhe të konsultohet me to në dy aspekte. Aspekti i parë është nëse ka gatishmëri që subjektet parlamentare të gjejnë një marrëveshje politike për të votu një kandidat për Qeveri në raundin e dytë, ose nëse nuk ka fare gatishmëri dhe vullnet politik që partitë politike të mandatojnë një kandidat tjetër për formimin e Qeverisë atëherë presidentja nuk ka nevojë të ezauroj dhe shter afatet kushtetuese dhe me automatizëm vlerëson që në këto suaza nuk ka kushte për zgjedhje të Qeverisë dhe me rrjedhimisht mund të urdhërojë edhe shpërndarjen e Kuvendit të Kosovës”, shpjegon Bugaqku.
Nga ana tjetër, nënkryetari i Lidhjes Demokratike të Kosovës, Anton Quni thotë se nëse Albin Kurti reflekton, mund të ketë përafrim për koalicion LDK-VV.
Të hënën, kryeministri në detyrë dhe njëherit edhe kryetari i Vetëvendosjes, Albin Kurti ka thënë se bashkëpunim i kanë ofruar vetëm Lidhjes Demokratike të Kosovës dhe Nismës Socialdemokrate, por sipas Kurtit, të dyja e kanë refuzuar.
