Forcat izraelite kanë qëlluar “të shtëna paralajmëruese” ndaj një grupi diplomatësh në qytetin e Jeninit duke shkaktuar dënime të gjera ndërkombëtare.
Delegacioni, i përbërë nga përfaqësues të dhjetëra vendeve përfshirë Spanjën, Egjiptin, Francën, Turqinë, Irlandën, Italinë, Jordaninë dhe Mbretërinë e Bashkuar, ishte në një vizitë zyrtare për të vëzhguar situatën humanitare në zonë dhe për të dokumentuar shkeljet e mundshme të të drejtave të njeriut nga forcat izraelite.
Sipas një deklarate të Forcave Mbrojtëse të Izraelit (IDF), trupat qëlluan në ajër për të ndaluar lëvizjen e delegacionit që sipas tyre “kishte devijuar nga rruga e miratuar” dhe po i afrohej një zonë të ndaluar.
Ushtria izraelite tha se “shpreh keqardhje për shqetësimin e shkaktuar”, duke theksuar se do të zhvillohet një hetim i brendshëm dhe se përfaqësuesit e vendeve të përfshira do të informohen për rezultatet.
Ndërkohë, Autoriteti Palestinez akuzoi ushtrinë izraelite se ka shënjestruar qëllimisht delegacionin, duke e quajtur incidentin një “krim të tmerrshëm” dhe një shkelje të rëndë të normave ndërkombëtare diplomatike.
Një diplomat evropian tha se grupi ishte nisur për të parë nga afër “shkatërrimin” e shkaktuar nga muaj të tërë operacione ushtarake izraelite në Jenin.
Dënimi ndërkombëtar ishte i shpejtë. Spanja, Franca, Italia dhe Turqia njoftuan se do të thërrasin ambasadorët izraelitë për të kërkuar shpjegime.
Shefja e politikës së jashtme të Bashkimit Evropian, Kaja Kallas deklaroi se “çdo kërcënim ndaj jetës së diplomatëve është i papranueshëm” dhe kërkoi që përgjegjësit të mbahen para drejtësisë.
Irlanda konfirmoi se dy diplomatët e saj, me seli në Ramallah, ishin pjesë e grupit dhe kryeministri Micheál Martin deklaroi se do të kërkojë shpjegime të qarta nga Izraeli.
Egjipti e cilësoi incidentin si një shkelje të të gjitha normave diplomatike ndërsa Turqia e quajti atë “një tjetër demonstrim të shpërfilljes sistematike të Izraelit ndaj ligjit ndërkombëtar dhe të drejtave të njeriut”.
Incidenti ndodhi në kuadër të një fushate të gjerë ushtarake të nisur nga Izraeli në janar, me qëllimin për të “mposhtur terrorizmin” në qytetin e Jeninit. Që atëherë, operacioni është zgjeruar edhe në qytetet e Tulkarmit dhe Tubasit.
Sipas Kombeve të Bashkuara, rreth 40,000 palestinezë janë zhvendosur me forcë nga kampet e refugjatëve për shkak të urdhrave të autoriteteve izraelite që u kanë ndaluar kthimin për të paktën një vit.
Sipas të dhënave më të fundit të OKB-së, nga fillimi i vitit 2025 janë vrarë 124 palestinezë në Bregun Perëndimor nga forcat izraelite.
Ndërsa hetimet për incidentin në Jenin pritet të vazhdojnë, ngjarja ka shtuar edhe më shumë presionin diplomatik mbi Tel Avivin dhe ka thelluar përçarjen mes Izraelit dhe një numri në rritje vendesh që kërkojnë llogaridhënie për veprimet në territoret e pushtuara.
