Selektori i Kombëtares së Kosovës, Franco Foda beson në fitore ndaj Suedisë, në ndeshjen kualifikuese për Botërorin 2026, që luhet të hënën mbrëma në stadiumin “Fadil Vokrri” në Prishtinë.
Foda ka pranuar se Suedia është favorite në këtë përballje, por personalisht beson se Kosova do të paraqitet shumë më mirë sesa ndaj Zvicrës.
Kosova të premten e nisi ciklin eliminator në Basel, ku u mposht nga Zvicra 4:0 në kuadër të Grupit B.
“E kemi analizuar ndeshjen e fundit të Suedisë. Suedia ka lojtarë shumë të mirë, shumë të fuqishëm, sidomos në sulm. E kemi parë që dy sulmuesit do të jenë të pranishëm. Do t’i shikojmë të gjithë skenarët., E dimë që Suedia ka shumë përvojë. Suedia do të jetë favorite. E rëndësishme të tregojmë fytyrë tjetër në krahasim me ndeshjen ndaj Zvicrës. Në pjesën e dytë kemi luajtur shumë mirë dhe duam të luajmë atë ndeshje me Suedinë. Jemi në shtëpi dhe duam të fitojmë”, tha Foda.
Ai foli edhe për mungesën e kapitenit Amir Rrahmani, duke insistuar se kanë zëvendësim për mbrojtësin e Napolit.
“Amir Rrahmani është ndër lojtarët më të rëndësishëm të ekipit. Mungojnë edhe Rashica, Hadërgjonaj, Zhegrova që po ashtu janë të rëndësishëm. Si kapiten dhe lider i ekipit, Rrahmani do të na mungojë. Na mbetet të gjejmë zgjidhje të tjera dhe mendoj se kemi mjaftueshëm mbrojtës për ta zëvendësuar kapitenin Rrahmani”, shtoi Foda.
Sa i përket disfatës nga Zvicra, Foda ka insistuar se nuk do të ndryshonte asgjë në formacion.
“Nuk do të ndryshoja asgjë nga ekipi. Të gjithë ishim shumë të bindur. I njëjti ekip luajti ndaj Islandës. Vetëm dy ndryshime ishin, Jashari e zëvendësoi Rashicën, Avdullahu luajti ndaj Berishës. Të gjithë ishim të kënaqur me atë ekip”, u shpreh ai.
Foda pret që ekipi i tij ti kënaq tifozët me lojë të mirë ndaj Suedisë.
“Ishim të vetëdijshëm që Zvicra ka ekip shumë të fortë. Duke ditur se Zvicra ka ekip të fortë, nuk kemi mundur ta zbatojmë mënyrën tonë të lojës. Në pasime nuk ishim preciz. Në mbrojtje kemi bërë gabime. Në pjesën e dytë kemi luajtur pak më mirë. Dje kemi analizuar shumë mirë gabimet e ndeshjes me Zvicrën. Kemi analizuar secilin gabim. Jam shumë i bindur se kundër Suedisë do të kemi paraqitje shumë të mirë. E dimë që do të jetë ndeshje me shumë intensitet, me presion të lartë. Do të ketë duele një kundër një. Do të gjejmë zgjidhje. Jemi në shtëpi dhe dëshirojmë t’i kënaqim tifozët, Dardanët, njëjtë si në ndeshjet e kaluara që i kemi fituar”, përfundoi Foda.
