Një pjesë e ditës së martë, ishte rezervuar për fjalët përfundimtare për Zyrës së Prokurorit të Specializuar.
Për ditën e dytë rresht, prokuroria sërish atakoi dëshmitarët e mbrojtjes.
Kësaj radhe, u tha se James Rubin dhe Uesley Clark, ishin manipuluar nga Hashim Thaçi.
“Ajo që nuk e kuptonin James Rubin, Ëesley Clark dhe ndërkombëtarët e tjerë, është se Thaçi ishte i aftë të maskonte atë që po ndodhte në realitet, dhe kjo ndikoi në botëkuptimin e tyre për të kuptuar vërtet sesi funksiononte UÇK-ja. Veçanërisht Rubin dhe Clark treguan se nuk kishin kurrfarë interesi për të kuptuar çfarë po ndodhte në realitet. Besonin se puna e tyre ishte në anën e duhur të historisë dhe nuk u përballën me atë çka po dëgjonte trupi gjykues. Hashim Thaçi ka qenë një përkrahës i drejtpërdrejtë i qëllimit të përbashkët kriminal”, tha Prokurori Matt Halling.
Ajo që e nisi edhe e përmbylli fjalën përfundimtare të prokurorisë.
Edhe një herë, kryeprokurorja e specializuar kërkoi dënimin e ish krerëve të UÇK-së.
“Kanë kaluar shumë vite tashmë dhe ata të cilët kanë humbur pjesëtarët e familjes kanë menduar se nuk do të kenë drejtësi, por shteti i së drejtës nënkupton që askush nuk është mbi të drejtën dhe ligjin. Kjo do të thotë që edhe njerëzit më të fuqishëm duhet të japin llogari. Ne kërkojmë mbi bazën e provave të paraqitura të cilat e vërtetojnë përgjegjësinë pa asnjë dyshim që të akuzuarit të japin llogari dhe të jepet dënimi i duhur. Mbi 5 mijë prova materiale janë pranuar dhe 28 mijë faqe transkriptë janë paraqitur këtu dhe kështu procesverbali i kësaj çështjeje verbale është voluminoz”, tha kryeprokurori Kimberly Uest.
Po të martën, fjalët e fundit i tha edhe mbrojtja e viktimave, ku u kërkua që trupi gjykues t’i përfshijë viktimat e pretenduara të krimeve në aktgjykim.
“Mizoria që kemi parë në këtë çështje gjyqësore ka qenë ekstreme. Nuk mjaftonte që t’i ndëshkojnë personat thjesht duke i burgosur, por në pothuajse në të gjitha rastet, të ndaluarit, viktimat që unë përfaqësoj- u trajtuan në mënyrë të tmerrshme dhe mizore edhe nuk pati absolutisht proces të drejtë ligjore. Ky është një grup që ka vuajtur një dëm shumë specifik dhe ne e ftojmë gjykatën që ta njohë në aktgjykimin e vet”, tha Simon Laws, mbrojtës i viktimave.
Sipas mbrojtësit të viktimave, pjesëtarët e UÇK-së, vepronin në bazë përkatësie etnike ndaj personave që i arrestonin.
“Mënyra se si një shqiptar të gjendet në një kamp të paraburgimit të UÇK-së, ishte të etiketohet si bashkëpunëtor ose për një arsye tjetër që të shihet si kundërshtar. Për një serb ose rom, ishte bazë e mjaftueshme vetëm përkatësia etnike”, tha Laws.
Pas mbrojtësit të viktimave, fjalët përfundimtare do t’i fillojnë ekipet mbrojtëse, duke nisur nga ajo e Hashim Thaçit.
