Llapi – Prishtina, sfida kryesore e xhiros së katërt të Superligës së Kosovës në futboll nuk prodhoi fitues.
Të dielën në Podujevë, ndeshja përfundoi 0:0.
Për Llapin është barazimi i parë. Me shtatë pikë renditet i katërti. Derisa Prishtina ka dy barazime e dy fitore dhe me tetë pikë renditet e treta.
Ndërsa kampioni në fuqi Ballkani është kthyer me fitore në Superligë.
Të dielën në Suharekë në kuadër të xhiros së katërt, Ballkani fitoi 2:1 ndaj Gjilanit.
Ballkani nuk luajti javën e kaluar pasi ishte i fokusur në garën në Ligën e Konferencës.
Ndaj Gjilanit, golin e fitores e shënoi Arb Manaj në minutën e 78-të.
Në pjesën e parë realizoi gol Albin Krasniqi. Rezultatin në 1:1 e barazoi Oltion Bilalli.
Ndërkaq portieri Kenan Haxhihamza ishte vendimtar për Dukagjinin në ndeshjen ndaj Dritës.
Ai priti penalltinë e Besnik Krasniqit në minutën e 92-të të ndeshjes së zhvilluar në Gjilan. Ndeshja e luajtur të dielën përfundoi baras 2:2. I takoi javës së katërt të Superligës së Kosovës në futboll.
Dukagjini shënoi i pari nëpërmjet Bujar Shabanit.
Ai realizoi në minutën e 30-të, ndërsa Drita me Besnik Krasniqin barazoi fillimisht rezultatin në 1:1 në minutën e 40-të. Blerim Krasniqi shënoi golin e epërsisë 2:1 pesë minuta më vonë.
Golin e barazimit, Dukagjini e shënoi në minutën e 61-të. Drita ka pesë pikë, kurse Dukagjini dy.
