Ministria e Punëve të Brendshme ka njoftuar se është furnizuar me material për dokumentet identifikuese si pasaporta dhe patentë shofer, raporton teve1.info
Sipas njoftimit të MPB-së, deri më tani me këto dokumente janë pajisur aplikuesit e muajit shtator dhe tetor të vitit të kaluar si dhe ato të aplikimeve urgjente.
Ndërkohë, MPB ka njoftuar se po punon me kapacitet të plotë të prodhimit ditor si dhe jashtë orarit të rregullt të punës.
“Ministria e Punëve të Brendshme njofton të gjithë qytetarët e Republikës së Kosovës, se situata e furnizimit me dokumente ka filluar të stabilizohet, pas pranimit të kontingjentit të ri të dokumenteve blanko.
Me qëllim të furnizimit me pasaporta dhe patentë shoferë për ata që janë në pritje si dhe aplikimet e reja, Ministria e Punëve të Brendshme, përkatësisht Agjencia e Regjistrimit Civil, do të punojë me kapacitete të plota të prodhimit ditor dhe angazhimin e stafit edhe jashtë orarit të rregullt të punës.
Ju njoftojmë se, qytetarët të cilët kanë aplikuar në muajin shtator dhe tetor dhe ato urgjente, tashmë janë pajisur me dokumente, ndërsa do të vazhdojnë të pajisen me dokumente personale të gjithë ata qytetarë të cilët janë në pritje sipas renditjes, respektivisht datës së mëhershme të aplikimit”, thuhet në njoftimin e MPB-së.
Materiali i nevojshëm për dokumente identifikuese në Kosovë ka munguar që nga shtatori i vitit të kaluar, derisa ka pas ankesa të qytetarëve për probleme me udhëtim.
