Ka nisur sot, nën përcjelljen e Policisë së Kosovës, aksioni për lirimin e hapësirave që janë në pronësi të Ministrisë së Bujqësisë, Pylltarisë dhe Zhvillimit Rural në Prishtinë.
Bëhet fjalë për dy objektet afariste “Eida & Patroni” dhe “Liria”, të cilat ndodhen përballë objektit të Agjencisë së Kosovës për Inteligjencë (AKI).
Ky proces kishte nisur që nga shkurti i vitit 2024, pas vendimit të Ministrisë së Bujqësisë për lirimin dhe rikthimin në shfrytëzim të pronave publike që administrohen nga kjo ministri.
Sipas vendimit të siguruar më herët nga mediat, ekzekutimi i vendimit parashihej të realizohej nga personat dhe organet kompetente të autorizuara të Ministrisë së Bujqësisë, me asistimin e Policisë së Kosovës dhe Drejtorisë së Inspektimeve të Komunës së Prishtinës.
Në dokument thuhej gjithashtu se gjatë ekzekutimit të vendimit, zyrtarët kompetent do të kryenin regjistrimin e inventarit dhe mallrave të gjetura në hapësirat publike, ndërsa më pas ato do të deponoheshin në hapësira përkatëse.
Pas përfundimit të regjistrimit të inventarit, zyrtarët e ministrisë do të bënin ndërrimin e cilindrave të dyerve hyrëse dhe mbylljen e objekteve.
Në vendngjarje sot ishte i pranishëm edhe ministri në detyrë, Armend Muja, derisa aksioni po zhvillohet nën masa të shtuara sigurie.
