Sipas njoftimit të Komunës së Prishtinës, këto vizita do të realizohen nga stafi i kujdesit parësor shëndetësor dhe organizohen në bashkëpunim me Drejtorinë e Arsimit.
“Kanë si synim kontrollin shëndetësor të të gjithë nxënësve në shkolla, parandalimin e sëmundjeve, promovimin e shëndetit dhe edukimin shëndetësor”, thuhet në njoftim.
Sipas njoftimit, vizitave sistematike u nënshtrohen të gjithë nxënësit nga klasa e parë, pestë dhe klasa e nëntë.
“Kjo mundëson krahasimin me rezultate konkrete dhe të matshme për shëndetin e të gjithë nxënësve dhe masave konkrete që pritet pastaj të ndërmerren bazuar në këto rezultate. Për të parë nga afër fillimin e këtyre vizitave, Drejtori i Shëndetësisë Izet Sadiku dhe Drejtorja e Arsimit, Besianë Musmurati, do të vizitojnë shkollën fillore “Shkëndija” në Hajvali nesër, me datë 1 nëntor, duke filluar nga ora 09:00”, thuhet në njoftim.
Komuna e Prishtinës është e përkushtuar në sigurimin e shërbimeve mjekësore sa më cilësore e të domosdoshme për shëndetin e fëmijëve të kryeqytetit, njofton Komuna e Prishtinës.
