Kryeministri në detyrë Albin Kurti, bashkë me ministren në detyrë të Ekonomisë, Artane Rizvanolli, kanë vizituar të hënën fillimin e punimeve për shtrirjen e rrjetit optik të Telekomit të Kosovës, një projekt që u quajt strategjik e që u tha se shënon një hap të rëndësishëm në modernizimin e shërbimeve fikse të komunikimit në të gjithë territorin e vendit.
Kurti u informua për detajet teknike, hapësirën gjeografike që do të mbulohet dhe ndikimin konkret që ky investim do të ketë në cilësinë e shërbimeve për qytetarët dhe bizneset.
Siç bëhet e ditur, projekti përfshin zgjerimin e rrjetit optik në tërë territorin e vendit, duke mundësuar akses në: internet me shpejtësi të lartë (fiber), shërbime të avancuara televizive (IPTV/OTT) e linja moderne telefonike.
“Po e bëjmë vendosjen e fibrave optikë këtu në Fushë Kosovë që do të jetë shumë i dobishëm si për amviseritë, ndërtesat banesore, gjithashtu edhe për zonat industriale për bizneset e vendit tonë. Telekomin e Kosovës kjo udhëheqje e ka gjetur në 50 milionë euro borxhe, dhe në vitet 2023 dhe 2024, së bashku e kanë kthyer në një ndërmarrje fitimprurëse me 15 milionë euro fitim, dhe që është veçanërisht e rëndësishme, në fund të vitit të kaluar, bashkë me gjigandët e teknologjisë nga Suedia dhe nga Kroacia, Ericsson dhe Tesla, kemi bërë modernizimin e rrjetit dhe e kemi mbuluar gjithë territorin e republikës, përfshirë edhe katër komunat në veri të Ibrit, me rrjetin 4G dhe 5G”, tha Kurti.
Ai shtoi se punimet po fillojnë në Fushë Kosovë e do të shtrihen anembanë territorit të vendi.
“Po ashtu jemi larguar prej disa operatorëve të ndryshëm të cilët na kanë pajisur me teknologji prej vendeve të cilat nuk janë mike me Kosovën dhe e kemi bërë zëvendësimin, tash çdo gjë e kemi me shtetet anëtare të Bashkimit Evropian e të NATO-s dhe Telekomi i Kosovës do ta ketë përkrahjen e aksionarit, pra Qeverisë së Republikës, për të vazhduar, për ta shtrirë rrjetin e optimizuar edhe më tej, pra edhe fiks edhe mobil”, u shpreh kryeministri Kurti.
