Për herë të parë, UEFA ka deleguar një gjyqtar nga Kosova në fazën “play-off” të Ligës së Konferencës.
Genc Nuza do të jetë gjyqtari kryesor në ndeshjen ndërmjet Strasbourgut të Francës dhe Brondbyt të Danimarkës, ka njoftuar të mërkurën Federata e Futbollit të Kosovës (FFK).
Kjo është ndeshja e parë e fazës “play-off” dhe do të luhet të enjten prej orës 20:00 në stadiumin “Stade de la Meinau” në Strasbourg.
Nuza në këtë ndeshje do të asistohet Bujar Selimaj e Granit Hyseni, gjyqtar i katërt do të jetë Burim Jahmurataj kurse rolin e AVAR-it do të mbajë Dardan Çaka.
“Delegimi i gjyqtarëve nga Kosova në një ndeshje kaq të rëndësishme dëshmon për profesionalizmin, përkushtimin dhe punën e palodhshme të tyre ndër vite, si dhe për besimin që UEFA ka në drejtësinë e ndarë prej tyre”, ka shkruar FFK, duke shtuar se gjyqtarët do ta përfaqësojnë me nder dhe dinjitet futbollin kosovar në arenën ndërkombëtare.
Arbitrat nga Kosova këtë sezon kanë ndarë drejtësinë edhe në disa ndeshje tjera të fazave kualifikuese të garave evropiane.
