Komiteti Ekzekutiv i FFK-së ka marrë një sërë vendimesh në mbledhjen e mbajtur këtë të premte në selinë e FFK-së, derisa njëra nga ta është ndarja e rrugës me katër përzgjedhës të përfaqësueseve të Kosovës.
Bashkëpunimi nuk është vazhduar me Ramiz Krasniqin e Kosovës U19, Arsim Abazin e Kosovës U17, Kushtrim Munishin e Kosovës U19 (vajzat) dhe Arben Simitçiun e përfaqësueses A të Kosovës në futsall.
“KE analizoi dhe shqyrtoi punën dhe rezultatet e Kombëtareve U19 meshkujt, U17 dhe U19 të femrave si dhe Kombëtares A në futsall. Ndaj në bazë të rezultateve të treguara FFK-ja nuk do të vazhdojë bashkëpunimin me përzgjedhësit dhe bashkëpunëtorët e tyre, me Ramiz Krasniqin përzgjedhës i Kombëtares U19, me Arsim Abazin përzgjedhës i Kombëtares U17 të meshkujve, me Kushtrim Munishin përzgjedhës i Kombëtares U19 të femrave si dhe Arben Simitçiu përzgjedhës i Kombëtares A futsall. KE i falënderon për angazhimin dhe kontributin e tyre gjatë kësaj periudhe”, thuhet në njoftim.
