Kategorizimi i sporteve për vitin 2025 i shpallur javën e kaluar nga Ministria për Kulturë, Rini dhe Sport ka ngjallur reagime dhe pakënaqësi te shumë federata të cilat vlerësojnë se nuk u janë njohur shumë pikë ani pse kanë pasur aktivitete vendore dhe ndërkombëtare.
Në Federatën e Basketbollit, që renditet në kategorinë B, thonë se Komisioni i MKRS-së nuk ua ka njohur fare aktivitetet ndërkombëtare të gjeneratave të reja ani pse ato ishin mjaftë të suksesshëm.
Sekretarja e FBK-së, Elvira Dushku ka bërë të ditur se kanë bërë ankesë për këtë diskriminim në MKRS ndërsa nga mungesa e këtyre pikëve, buxheti i kësaj federate dëmtohet për rreth 300 mijë euro.
Të pakënaqur janë edhe në Federatën e Boksit pasi janë renditur në kategorinë C. Sekretari i kësaj federate Latif Demolli thotë së MKRS ua ka hequr 17 pikë në kategorizim dhe presin që pas ankesës ato t’u kthehen.
Me pozicionimin në kategorinë B janë të pakënaqur edhe në Federatën e Karatesë. Nazmi Gashi, sekretar i kësaj federate thotë se është mohuar puna dhe djersa e sportistëve dhe trajnerëve të këtij sporti.
Ndryshe nga federatat më lartë, ajo më e madhja në vend, Federata e Futbollit të Kosovës nuk do të ankohet në MKRS edhe pse është renditur në kategorinë B.
Kryetari i kësaj federate, Agim Ademi ka thënë se nuk do të bëjnë ankesë sepse besojnë se vlerësimi është bërë nga ekspertë të kësaj fushe brenda Ministrisë së Sportit.
Nga MKRS kanë thënë se nuk duan të komentojnë pasi në ditët në vazhdim do të shqyrtohen ankesat e të gjitha federatave
