Fatmir Sheholli është dërguar të premten në Gjykatën Themelore në Prishtinë, një ditë pas arrestimit të tij nën dyshimin për kryerjen e veprës penale “Spiunazh”.
Prokuroria Speciale ka bërë të ditur se ndaj tij është kërkuar caktimi i masës së paraburgimit, ndërsa pas seancës dëgjimore pritet që gjykata të vendosë për masën e sigurisë që do t’i caktohet.
Sheholli, i njohur si ish-pjesëtar i Sigurimit Shtetëror të Serbisë në pjesën e parë të viteve ’90, edhe pas luftës ka ruajtur lidhje me politikanë serbë në Kosovë. Ai ka qenë aktiv edhe në kuadër të Institutit për Avancimin e Marrëdhënieve Ndëretnike, ku ka promovuar çështje që lidhen me bashkëjetesën ndëretnike.
Pas arrestimit të tij të enjten, policia ka kryer bastisje në banesën e Shehollit, e cila ndodhet në Prishtinë. Hetues të njësive relevante janë parë duke dalë nga objekti ku ai banon, duke sekuestruar materiale, të cilat dyshohet se lidhen me hetimin në fjalë.
Autoritetet ende nuk kanë dhënë detaje shtesë për përmbajtjen e materialeve të konfiskuara apo për natyrën konkrete të aktivitetit të dyshuar.
