Familjet e Hashim Thaçit, Kadri Veselit dhe Jakup Krasniqit nuk do të takohen me ushtruesen e detyrës së presidentes, Albulena Haxhiu.
Lajmi është bërë i ditur nga Altin Krasniqi, djali i Jakup Krasniqit, përmes një letre publike në emër të tri familjeve.
Në letër, familjet kanë thënë se e vlerësojnë ftesën e Haxhiut, por kanë kërkuar që takimi të zhvillohet pas vendimit të Kuvendit.
“E vlerësojmë ftesën e Albulena Haxhiut, por, për t’iu shmangur çdo keqkuptimi të mundshëm lidhur me ndikimin dhe ndërhyrjet familjare në vendimmarrjen e institucioneve të Republikës së Kosovës, presim që të takohemi pas vendimit të Kuvendit”, thuhet në letër.
Në të njëjtën letër, familjet shprehin mirënjohje për popullin e Kosovës për mbështetjen dhe solidaritetin ndaj procesit gjyqësor në Hagë, si dhe bëjnë thirrje për përgjegjësi institucionale dhe unitet qytetar.
Letra e plotë:
Letër e familjeve Thaçi, Veseli dhe Krasniqi
Ne, familjet e Hashim Thaçit, Kadri Veselit dhe Jakup Krasniqit, bëjmë thirrje për përgjegjësi institucionale dhe unitet qytetar në këto momente.
Shprehim mirënjohjen tonë të thellë për popullin e Kosovës për mbështetjen, solidaritetin dhe qëndrimin e tij të vazhdueshëm ndaj procesit gjyqësor në Hagë.
Presim sjellje të përgjegjshme shtetërore nga të zgjedhurit e popullit, në mbrojtje të Kushtetutës dhe ligjit, në raport me Dhomat e Specializuara.
E vlerësojmë ftesën e Albulena Haxhiut, por, për t’iu shmangur çdo keqkuptimi të mundshëm lidhur me ndikimin dhe ndërhyrjet familjare në vendimmarrjen e institucioneve të Republikës së Kosovës, presim që të takohemi pas vendimit të Kuvendit.
Ndryshe, ushtruesja e detyrës së presidentes, Albulena Haxhiu, ka ftuar në takim familjarët e ish-krerëve të UÇK-së, pak ditë pas dënimit të Hashim Thaçit, Kadri Veselit, Rexhep Selimit dhe Jakup Krasniqit nga Dhomat e Specializuara në Hagë./teve1,info/
