Askush nuk do ta festojë më një gol të Diogo Zotës në Anfield. Askush nuk do të presë që 28-vjeçari të shënojë përsëri për ekipin kombëtar portugez.
S’do ta shohim atë pranë Mo Salahut në sulmin e Liverpoolit sezonin e ardhshëm, as përkrah Cristiano Ronaldos në stadiumet e Shteteve të Bashkuara në Kupën e Botës 2026.
Diogo Jota vdiq në orët e para të mëngjesit të së enjtes pasi pësoi aksident në një autostradë në Spanjë.
Ai ishte vetëm 28 vjeç dhe udhëtonte në makinë së bashku me të vëllanë, 26-vjeçarin Andre Silva.
Jose Mourinho, trajneri më i madh portugez i të gjitha kohërave dhe trajner i ekipit të dashur të Jotas, Porto, tha se ishte një padrejtësi e madhe që dikush të vdiste kaq i ri.
Ai la pas tre fëmijë (një foshnjë) dhe gruan me të cilën ka qenë i lidhur që në shkollë.
Diogo Zota fitoi kampionatin me Liverpoolin në vitin 2025, në vitin e tij të 5-të me Reds, ndërsa ka luajtur për Atletico Madridin, Wolves dhe Porton.
Me kombëtaren portugeze ai pati 49 paraqitje (12 gola, 14 asiste), fitoi 2 Liga të Kombeve dhe mori pjesë në Euro 2020.
Lajmi për vdekjen e tij “zhyti” Porton dhe Liverpoolin në zi, ndërsa yje si Ronaldo, Messi, Mbappe dhe Nadal i dhanë lamtumirën nëpërmjet rrjeteve sociale.
Një udhëtim pa kthim
Diogo Zota humbi jetën tragjikisht teksa udhëtonte me Lamborghini Huracan-in e tij. Një supermakinë që u shndërrua në një masë pa formë.
Asi i Liverpoolit dhe vëllai i tij ishin 70 km larg Valladolid dhe po shkonin në Santander.
Prej andej, 28-vjeçari do të merrte varkën për në Portsmouth dhe pastaj do të shkonte në Liverpool.
Të martën (8/7) fillon përgatitja e Liverpool dhe futbollisti donte të ishte atje më herët për t’u sistemuar.
Vëllai i tij, i cili ishte gjithashtu futbollist, por jo në një nivel kaq të lartë, nuk do të hipte në anije, por do të kthehej me rrugë tokësore, pasi do e linte makinën në port.
Santander është 350 km larg nga pika ku ndodhi aksidenti dhe siç tregon raporti, dy futbollistët do të kalonin natën në një motel në zonë dhe do të vazhdonin në mëngjes për në destinacionin e tyre.
Dy vëllezërit e lindur në Porto nuk arritën kurrë në portin e Santander pasi ndoqën një… rrugë pa kthim.
Pyetja që duhet të marrë përgjigje është se pse makina luksoze e Zotës u shndërrua në një grumbull metalesh.
Dy vëllezërit u dogjën nga zjarri që shpërtheu pas përplasjes dhe nuk mundën të identifikoheshin nga të afërmit e tyre.
Megjithatë, sipas “O Jogo”, prindërit dhe gruaja e Diogo Jotës udhëtuan për në Spanjë, vizituan Institutin e Mjekësisë Ligjore dhe Shkencave Ligjore Zamora dhe identifikuan dy trupat përmes objekteve.
Gruaja e futbollistit, me të cilën ai u martua 12 ditë më parë, i konfirmoi numrin e targës autoriteteve.
Por çfarë ndodhi saktësisht? Një shofer kamioni, i cili filmoi edhe videon e makinës së Zotës duke u djegur, u tha autoriteteve që e morën në pyetje se e pa makinën të dilte nga rruga, të godiste barrierat dhe të merrte flakë.
