Është i arrestuari i parë dhe i dënuari i parë Gjykatës Speciale nën akuzat për krime lufte.
Salih Mustafa, pas vendimit të apelit, u dënua me 15 vite burgim.
Që nga shtatori i vitit 2020, ai ndodhet në qendrën e paraburgimit në Hagë.
Pesë vite pas, ai ka mundësi që të vijë në Kosovë.
Kjo për një vizitë tek babai i tij, i cili është në një gjendje të rënduar shëndetësore.
Megjithatë, nga Gjykata Speciale thonë se ende nuk është bërë një kërkesë që Mustafës t’i lejohet të vijë në Kosovë që ta vizitojë babanë.
“Korniza ligjore e Dhomave të Specializuara të Kosovës u lejon të paraburgosurve të kërkojnë një vizitë në Kosovë për arsye bindëse humanitare. Megjithatë, deri më tani nuk ka asnjë dosje publike që trajton pyetjen tuaj nëse është bërë një kërkesë”, thotë Angela Griep, zëdhënse e Dhomave të Specializuara.
Tëvë 1 ka tentuar të marrë një përgjigje nga avokati i Mustafës në lidhje me këtë kërkesë, por i njëjti ka qenë i paqasshëm.
Mirëpo, nga familja kanë konfirmuar se kërkesa veçse është bërë.
Kështu thonë edhe nga Organizata e Veteranëve të Luftës së UÇK-së.
“Avokati i Salih Mustafës ka bërë kërkesë, kjo është reale. Por, nuk kemi të dhëna nëse iu ka leju vizita apo jo. Ne ju kemi bërë thirrje, kemi reagu që është e drejtë legjitime dhe e garantume me konventa ndërkombëtare që iu lejohet në mënyrë humanitare me vizitu babain e vet, që është i shtrirë në spital dhe e ka gjendjen e rëndë”, ka thënë Hysni Gucati – kryetar i OVL –UÇK-së
Ai tregon se sa rëndë e përjetojnë moslejimin e vizitës të paraburgosurit, pasi edhe vet sa ishte në Hagë ishte ballafaquar me një rast të tillë.
“Në shpirt e di çka domethënë kur e ki familjarin e sëmurë dhe nuk mundesh me ardhë me vizitu, e ka vuajt edhe Hashimi, Kadria, Jakupi, Haxhi Shala e Nasimi. Do të thotë ne i kemi pasur këto raste në burg që edhe na kanë vdekë familjarët dhe kjo është shumë e rëndë për Salih Mustafën dhe për familjen, se Gjykata nuk e lejon me ardhë për një vizitë dhe kjo është një sjellje ma e poshtër, s’di qysh me thanë më keq”, thotë Gucati
Për arsye të njëjtë, vizitë tek familjarët e sëmurë, Gjykata Speciale ua pati lejuar ardhjen në Kosovë, Hashim Thaçit e Kadri Veselit.
