Basketbollistët e Kombëtares së Kosovës, kanë mësuar kundërshtarët e raundit të parë parakualifikues për Eurobasketin e vitit 2029.
Të hënën është bërë tërheqja e shortit në Riga të Letonisë, ku është përcaktuar që Kosova të jetë pjesë e Grupit C parakualifikues, i cili përbëhet prej tri Kombëtareve.
Në këtë grup me Kosovën, janë edhe Kombëtarja e Shqipërisë dhe ajo e Sllovakisë, të cilat do të përballen me ndeshjet vajtje – ardhje.
Kosova ishte në vazon e dytë, Shqipëria në të tretën kurse Sllovakia ishte pjesë e vazos së parë.
Në short, gjithsej ishin 10 kombëtare të ndara në katër vazo nga FIBA sipas renditjes botërore, ndërsa vetëm njëri prej tri grupeve përbëhet prej katër kombëtareve.
Raundi i parë i parakualifikimeve do të luhet në tri dritare, me ndeshjet e para që do të zhvillohen në nëntor të këtij viti, pastaj të dytat në shkurt të vitit të ardhshëm dhe të tretat në periudhën qershor – korrik, po ashtu të vitit të ardhshëm.
Datat e ndeshjeve do të përditësohen nga FIBA, ndërsa në rrethin e dytë kualifikues avancojnë tri vendet e para dhe vendi i dytë më i mirë.
