Talenti në rritje i Bayern Munichut, Erblin Osmani ka vendosur ta përfaqësojë kombëtaren e Kosovës.
I riu Osmani së fundmi është pajisur me pasaportën e Republikës së Kosovës, derisa tashmë është dhënë edhe lajmi se ka pranuar të luajë për kombëtaren e Kosovës.
Këtë lajm e ka dhënë Ambasadori i Kosovës në Gjermani, Faruk Ajeti, përmes një postimi në rrjetin social “Facebook”.
“Nder i veçantë që sot ia dorëzova pasaportën e Republikës së Kosovës talentit tonë të Bayern München, Erblin Osmanit dhe gjithashtu të ndaj lajmin e madh për futbollin kosovar: Erblini do të luajë për Kosovën! Mezi presim ta shohim talentin tonë me fanellën e Dardanëve dhe ta përfaqësojë Kosovën me krenari. Faleminderit Presidentit Agim Ademi dhe Federatës së Futbollit të Kosovës për angazhimin dhe përkushtimin. Kjo është edhe një dëshmi tjetër se talentët tanë po zgjedhin Kosovën dhe se e ardhmja e futbollit tonë është e ndritur!”, shkruan Ajeti.
Erblin Osmani është 17-vjeçar dhe luan për Bayern Munichun U19, derisa në mars të këtij viti kishte debutuar edhe me ekipin e parë në Bundesliga, duke luajtur në ndeshjen ndaj Union Berlinit për pak minuta.
Osmani luan në pozitën e mesfushorit, derisa ka kontratë me Bayernin deri në vitin 2029.
