Stuhia e fortë që goditi mbrëmë Zagrebin dhe zonën përreth la pas pasoja të shumta, ndërsa skenat dramatike vazhduan edhe këtë mëngjes teksa shërbimet e qytetit po largojnë dëmet dhe po pastrojnë terrenin.
Banorët e Zagrebit mëngjesin e sotëm morën paralajmërime në telefonat e tyre përmes sistemit HR-ALARM, ndërsa për shkak të kushteve në trafik dhe rrezikut, mësimi u pezullua në të gjitha shkollat fillore dhe të mesme në zonën më të gjerë të qytetit.
Sipas informacioneve të disponueshme, ndryshimi i papritur i motit erdhi me erëra të forta që në disa momente arritën intensitet stuhie.
Që gjatë mbrëmjes u regjistruan incidente të shumta, pasi era rrëzoi pemë në të gjithë qytetin, ndërsa disa rrugë u bllokuan plotësisht.
Në kryqëzimin e rrugëve Selska dhe Zagorska, një pemë e rrëzuar ndaloi trafikun, ndërsa situata të ngjashme u regjistruan edhe në bulevardin Vukovarska pranë tregut Treshnjevaçki.
Në disa lagje të Zagrebit u raportuan edhe probleme me energjinë elektrike, ndërsa qytetarët njoftuan për dëmtime në objekte, përfshirë çati dhe fasada.
Në disa raste, pemët ranë mbi makina të parkuara, duke shkaktuar dëme materiale, por fatmirësisht pa lëndime të rënda.
Qyteti i Zagrebit konfirmoi se shërbimet kryen më shumë se njëqind ndërhyrje gjatë natës, ndërsa zjarrfikësit dhe ekipet komunale larguan pemët e rrëzuara, degët dhe pengesat e tjera nga rrugët dhe hapësirat publike.
Mëngjesi pas stuhisë solli kushte disi më të qeta, por edhe nevojën për kujdes të vazhdueshëm. Disa rrugë mbeten ende pjesërisht të mbyllura ose të vështira për t’u kaluar.
Ndërkohë, meteorologët paralajmëruan se moti i paqëndrueshëm mund të vazhdojë edhe për një kohë, me mundësi për erëra dhe reshje të reja.
Stuhia nuk preku vetëm Zagrebin.
Në mbarë Kroacinë u regjistruan probleme të ngjashme, përfshirë borë në zonat malore dhe vështirësi në trafik, duke dëshmuar përmasat e kësaj fatkeqësie natyrore.
Qytetarëve u këshillohet të jenë të kujdesshëm, veçanërisht pranë pemëve, kantierëve dhe objekteve të dëmtuara, ndërsa shërbimet përkatëse vazhdojnë punën në terren.
