Futbollistët kosovarë tashmë e disa vite po e thonë fjalën kryesore në kampionatet kryesore të Evropës sikurse në La Liga, Ligue 1, Bundesliga dhe Serie A.
Lojtarë si Vedat Muriqi i cili po shkëlqen me Mallorcan duke u shndërruar në lojtarin kryesor të këtij ekipi dhe një nga golashënuesit më të mirë në kampionat po tregon se futbollistët tanë po rritën dhe po e përfaqësojnë Kosovën në mënyrë dinjitoze.
Po ashtu treshja fantastike e Kombëtares së Kosovës, Leon Avdullahu, Fisnik Asllani dhe Albian Hajdari, janë lojtarët kryesor te Hoffenheimi duke bërë paraqitje fantastike. Në Serie A, kemi lider si Amir Rrahmani te Napoli, Edon Zhegrova te Juventusi dhe Mërgim Vojvoda te Como.
Hapat e këtyre lojtarëve është duke i ndjekur talenti 18-vjeçar nga Kamenica, Ensar Rrudhani, i cili po shkëlqen me skuadrën e Winterthur U19.
Rrudhani ka nisur futbollin që në moshën 4-vjeçare dhe është i pasionuar pas futbollit, duke treguar një përkushtim të veçantë deri në arritjen e qëllimit të tij.
18-vjeçari luan si mbrojtës i djathtë, por mund të luaj edhe në krahun e majtë. Ai njihet për shpejtësinë e madhe që e ka, driblimet dhe goditjet e forta.
Sezoni 2025/2026 deri tani për Ensar Rrudhanin ka qenë fantastik, me shtatë asistime dhe dy gola në 15 paraqitje për skuadrën e Winterthur U19.
Rrudhani thotë se futbollin e ka pasion dhe e do me shpirt. Ai ka treguar se deri tani loja më e mirë e tij ka qenë kundër FC Baselit.
18-vjeçari ka treguar gjithashtu se momenti më i mirë i karrierës së tij deri tani ka qenë ballafaqimi me Paris Saint-Germain.
Ëndrra e tij mbetet që një ditë të luaj për skuadrën e FC Barcelonës, skuadër në të cilën ka luajtur legjenda e këtij klubi, Lionel Messi njëkohësisht idhulli i Ensar Rrudhanit.
