Pas Beogradit, Përfaqësuesi Special i Bashkimit Evropian, Miroslav Lajcak të martën e vizitoi Kosovën.
Takimet në vend i filloi me të parën e shtetit Vjosa Osmani.
Por, emisari ani pse ishte ora 14:00 priti pak para së të hynte në takim te Osmani.
E pas dy minutave, Lajcak e Osmani patën shtrëngim duarsh.
Pas kësaj, u zhvillua takimi me dyer të mbyllura.
E se cka u bisedua, Zyra e Presidencës tregoi përmes një komunikate.
“Sa i përket draftit të statutit të Asociacionit, Presidentja ritheksoi se institucioni i vetëm që mund ta interpretojë përfundimisht përputhshmërinë e këtij akti me Kushtetutën është Gjykata Kushtetuese e Kosovës, gjersa poashtu i shprehu shqetësimet e saj lidhur me disa dispozita të këtij drafti, të cilat mund të jenë sfiduese gjatë zbatimit në praktikë”, kanë deklaruar nga Presidenca.
E pas takimit një orësh me Osmanin, emisari i BE-së iu drejtua Qeverisë së Kosovës.
Aty Lajcak zhvilloi një takim tre palësh me kryeministrin e Kosovës, Albin Kurti dhe zëvendëskryeministrin Besnik Bislimi.
E një orë pas takimit trepalësh, zhvilloi takim edhe vetëm me zëvendëskryeministrin Bislimi.
Pas gati katër orëve në ekzekutivin kosovar, i dërguari i posaçëm i BE-së për dialogun Kosovë-Serbi, iu drejtua medieve.
Sipas tij, në Prishtinë ishte për të diskutuar për dialogun dhe progresin që mund të arrihet para se institucionet e Bashkimit Evropian të shkojnë në zgjedhje.
“Më nuk ka nevojë të pyetet se çfarë të bëhet e as si të bëhet, por kur duhet të bëhet implementimi. Nëse më pyesni mua unë kisha thënë që sa më parë të bëhet implementimi. Kisha bisedime të gjata me Kurtin e Bislimin dhe tani do të analizojmë ato që kemi dëgjuar nga ta. Do të njoftojë shtetet anëtare të BE-së për këto takime”, tha Emisari i BE-së për dialogun Kosovë-Serbi, Miroslav Lajçak.
Ai tha se bisedoi me kryeministrin Kurti edhe për vendimin e Kosovës për ta ndaluar përdorimin e dinarit në pagesat me para të gatshme në vend.
“E kemi përmendur këtë çështje në lidhje me vendimin e BQK-së por nuk dua të veprojë si zëdhënës i qeverisë. Nesër do të kuptoni më shumë për këtë”, u shpreh Lajçak.
Lajçak bëri të ditur se gjatë takimit u fol edhe për sulmin e 24 shtatorit në Banjskë, teksa theksoi se përgjegjësit e sulmit duhet të dalin para drejtësisë.
Më tej, emisari potencoi se Bashkimi Evropian s’është duke kryer hetime, por vetëm po merr informata, lidhur me sulmin në Banjskë.
