Kryetari i Klinës, Zenun Elezaj ka thënë se kjo komunë ka zvogëlim të numrit të nxënësve, ku në vit ka nga 200 më pak.
Elezaj në emisionin “ Info Nata” në Tëvë1 tha se tashmë kanë ndryshuar strategjinë, duke mos ndërtuar shkolla të reja, por vetëm i rinovojnë ato që kanë.
‘Ne kemi zvogëlim të numrit të nxënësve. Në 5 vitet e fundit pothuajse 200 nxënës në vit i kemi më pak. Kur kam ardhur unë para 6 vitesh si kryetar komune ideja ka qenë që të ndërtojmë 2-3 shkolla të reja, por tani vetëm e kemi ndryshuar këtë strategji, pasi vetëm po shkojmë në rinovimin e shkollave”, shtoi ai.
Elezaj tha se pretendojnë që të gjitha shkollat e komunës të jenë të pajisura me ngrohje qendrore dhe të jenë të izoluara.
‘Në qytet fatmirësisht është ndërtuar një shkollë, e cila është lëshuar në përdorim para 3 vitesh, pastaj edhe një shkollë tjetër e kemi rinovuar, por edhe nëpër fshatra jemi duke shkuar me rinovimin e shkollave. Normal ngrohjet qendrore janë problematike dhe jemi duke shkuar në ruajtje të energjisë me metoda efiçiente. Pothuajse të gjitha shkollat janë në proces të ndërrimit të ngrohjes, pra kalimit në pompa termike dhe me rrymë. Edhe izolim po ashtu, ku në vitin tjetër të gjitha do të jenë të izoluara nga jashtë”, tha ai./teve1.info
