Kompania serbe, Elektroserver e cila bënë faturimin e energjisë elektrike për katër komunat në veri të Kosovës të banuara me shumicë serbe, u ka bërë thirrje qytetarëve të nënshkruajnë kontratë me këtë kompani për furnizim me energji elektrike.
Sipas tyre nënshkrimi i kontratës është i bazuar në legjislacionin në fuqi.
Në njoftimin që ka bërë Elektoserver i lëshuar më 29 janar, të cilin e ka siguruar edhe Tëvë1, thuhet se kompania ka të drejtë të ndërpresë furnizimin me energji elektrike konsumatorit nëse nuk e nënshkruan kontratën brenda 10 ditëve.
“Kompania energjetike ka të drejtë të ndërpresë furnizimin me energji elektrike nëse konsumatori nuk nënshkruan kontratë me furnizuesin brenda dhjetë (10) ditëve nga data e publikimit të njoftimit. Për të shmangur ndërprerjet e mundshme në furnizimin me energji elektrike, duhet të keni një kontratë të vlefshme me furnizuesin tuaj të energjisë elektrike”, thuhet në njoftim.
Elektroserver ka filluar faturimin e energjisë elektrike në katër komunat veriore më 29 shkurt të vitit 2024, sipas marrëvehsjes së arritur në Bruksel ndërmjet Kosovës dhe Serbisë.
