Një shtetas kosovar i kërkuar me urdhërarrest ndërkombëtar është ekstraduar nga Gjermania në Kosovë.
Sipas Policisë, i dyshuari ishte arrestuar nga autoritetet gjermane për veprën penale “vrasje në tentativë”, pas një urdhërarresti ndërkombëtar të lëshuar nga institucionet e drejtësisë së Kosovës.
Pas ekstradimit, B.A iu dorëzua njësive përkatëse të policisë në Mitrovicë për të vazhduar procedurat ligjore.
“Policia e Kosovës, përkatësisht Drejtoria për Bashkëpunim Ndërkombëtar Policor, në koordinim dhe bashkëpunim me njësitet tjera relevante të Policisë së Kosovës dhe institucionet e drejtësisë, me datë 19.12.2025 ka bërë ekstradimin e shtetasit kosovar B.A., viti i lindjes 1994, nga Gjermania për në Kosovë. I dyshuarit ishte arrestuar nga autoritete Gjermane pasi që i njëjti kërkohej me urdhërarrest ndërkombëtar lëshuar nga institucionet e drejtësisë së Kosovës, për veprën penale “Vrasje në tentativë” dhe se i njëjti u ishte shmangur organeve të drejtësisë. I dyshuari pas ekstradimit, u është dorëzuar njësiteve përkatëse të policisë në Mitrovicë për vazhdim të procedurave tjera ligjore”, thuhet në njoftimin e Policisë së Kosovës./teve1.info/
