Interesimi për ta dëgjuar verditikn final, ishte i madh.
Për këtë, fjalën e mori, kryetari i trupit gjykues, Leon Përlaska.
Ky i fundit, e lexoi aktgjykimin, përmes të cilit i shpalli të pafajshëm tre anëtarët e familjes Mehmetaj.
Babai me dy djemtë, ishin të akuzuarit e vetëm për vrasjen e trefishtë që ndodhi në Gllogjan, në vitin 2021.
Por, me këtë vendim nuk po pajtohet prokurorja e rastit, Sahide Gashi.
Kjo e fundit të enjten në një intervistë ekskluzive për Tëvë1, tha se provat e administruara gjatë procesit dëshmojnë për përgjegjësinë e të akuzuarve.
“Duhet ta kemi të qartë që Prokuroria në asnjë moment dhe në asnjë rast nuk e komenton asnjë vendim të Gjykatës. Mirëpo, ajo çka duhet të themi është që Prokuroria e Shtetit në bashkëpunim me njësitë më elitare të hetuesve të këtij vendi, e ka hetuar që nga fillimi deri në fund këtë rast dhe kemi grumbulluar prova, të cilat e kanë ngritur këtë aktakuzë, e cila është bazuar ekskluzivisht në prova të materiale dhe dëshmitarë. Qofshin dëshmitarë okularë, qofshin dëshmitarë të lidhur me motivin qoftë provave materiale, shkencore, nga ekspertiza që kemi pranuar, qoftë brenda edhe jashtë të institucioneve të Forenzikës. Dhe ne vazhdojmë të besojmë, se këto prova bazojnë thellë dhe jemi të bindur se te akuzuarit janë kryesore veprat penale për të cilat janë akuzuar, thotë ajo.
Gashi shton se të hënën, mungoi edhe arsyetimi i aktgjykimit.
“Në aspektin profesional, si Prokurori e Shtetit, në çdo rast të rëndë që ka zgjuar interesim aq të madh, ku kemi vrasje të trefishtë, dy prej tyre fëmijë, me rastin e ndarjes së vendimit të Gjykatës, ekziston dhe gjithmonë ka ekzistuar një praktikë, sepse opinioni dëshiron së paku versionin e shkurtër, në rastin e marrjes së një vendimi, qoftë shfajësues, apo fajësues, të japë një version të shkurtër të arsyetimit. Pse në këtë rast nuk e ka bërë Gjykatë në momentin që duhet me i drejtuar asaj, ka marrë atë vendim”, shprehet Gashi.
Pavarësisht kësaj, Prokurorja Gashi, thotë se ky rast ende nuk ka përfunduar.
Kjo meqë prokuroria thotë se do të parashtrojnë ankesë në Gjykatën e Apelit.
“Unë qëndroj fort që këtë provë, e cila është administruar dhe është pranuar si provë nga Gjykatë e ka vërtetuar këtë akuzë. Dhe ky është vendimi i Gjykatës, mirëpo ju siguroj se këtu nuk ka përfunduar puna jonë. Ne, pasi ta marrim aktin që e kemi me shkrim dhe e analizojmë arsyet e Gjykatës, me patjetër do të ushtrojmë ankesë në Gjykatën e Apelit, dhe jemi të gatshëm ta shkojmë deri në fund”, shprehet ajo.
Ndërkohë, Tëvë1 ka vizituar edhe familje Mehmetaj në Gllogjan të Deçanit.
Tëvë1 te mërkurën ka provuar te marre një qëndrim edhe nga tre te akuzuarit për këtë rast, te cilët u shpallen te pafajshëm me vendim te gjykatës, por njeri nga ta, prapa kamerës, i tha televizionit se nuk janë te interesuar te flasin.
Ndryshe, pasi u liruan nga akuzat për vrasje të rëndë, Halil dhe Kreshnik Mehmetaj u shpallën fajtorë për armëmbajtje pa leje, ku njëri u dënua me 3 vjet ndërsa tjetri me 1 vit burgim.
