Ministria e Arsimit, Shkencës, Teknologjisë dhe Inovacionit (MASHTI) ka njoftuar se kanë mbetur edhe pesë ditë afat për aplikim për subvencionimin e teksteve dhe materialeve shkollore për nxënësit e arsimit fillor, nga klasa e parë deri në klasën e nëntë.
Sipas ministrisë, deri më sot, përmes platformës e-Kosova janë pranuar 144 mijë e 493 aplikime për përfitimin e subvencionit.
Procesi i aplikimit do të mbetet i hapur deri më 9 gusht.
“Ftojmë edhe një herë të gjithë prindërit dhe kujdestarët ligjorë që të aplikojnë, pasi kanë mbetur edhe pesë ditë deri në përmbylljen e afatit. Para aplikimit, sigurohuni që xhirollogaria bankare është aktive dhe e saktë, si dhe të dhënat tuaja në e-Kosova janë të përditësuara”, thuhet në njoftimin e MASHTI-t.
Ministria ka bërë të ditur se të gjitha aplikimet do të verifikohen nga shkollat përkatëse përmes koordinatorëve të autorizuar.
“Për informata shtesë qytetarët mund të kontaktojnë në adresën elektronike [email protected] dhe numrin e telefonit +383 (0) 38 200 65 049 “, theksohet në fund të njoftimit./teve1.info/
